湊BB總會小心翼翼跟足育兒書養最穩陣新手媽媽湊BB時常有嘅5個心態

By rachel.lo on 02 Oct 2018

初為人母，新手媽媽喺湊BB嘅過程中總會小心翼翼、緊張兮兮，最怕一時糊塗犯錯會影響BB健康。各位媽媽喺湊BB時，又有冇出現過以下呢5個心態呢？

1.只相信育兒書
初生BB就好似一個新人類，身體構造同護理方法都同大人本身有好大出入，令到好多媽媽喺面對BB一啲「奇怪」狀況嗰陣，例如：BB奶量改變、大便形態改變、各種皮膚問題⋯⋯都會即刻上網搵資訊或睇各類育兒書，只相信「專家」意見或提供嘅方法去照顧BB。

2.太在意其他人意見

「BB有便秘，要飲開奶茶！」、「便秘要飲西梅汁最好！」好多媽媽都鍾意用「過來人」身分熱心為新手媽媽提供意見，雖然係出於一番好意，但太多意見就會令媽媽頭痛，到底要聽邊個嘅說話呢？可能佢哋嘅方法都係有用，但就未必適合自己BB嘅情況，如果盲目將所有方法都通通試一次，有機會令BB嘅情況更嚴重，其實最清楚BB嘅非媽媽莫屬，遇到BB健康嘅疑惑，媽媽應該同健康院姑娘或醫生溝通，請佢哋根據你所描述嘅BB情況作出合適嘅解決方法。

3.犧牲自己
唔知點解，媽媽普遍都有一種犧牲精神，認為自己願意為BB犧牲得愈多，就係愈愛BB嘅表現。媽媽為咗照顧好小朋友，甘願犧牲外貌、興趣、私人時間同工作。雖然嘴裡一直埋怨，但係就將「犧牲」視為理所當然嘅事。其實媽媽 24 小時都「犧牲」一切照顧BB，會帶畀自己非常大嘅壓力，當壓力大到去臨界點時，可能BB一聲哭喊就會令媽媽嘅理智斷線，忽然情緒大爆發，最後遭殃嘅都係BB。所以愛自己愛BB，媽媽唔需要總諗住犧牲自己，反而偶爾要畀自己放鬆一下。

4.過分擔心BB健康
媽媽要對BB嘅生命負責，BB健康與否都一定關係到媽媽嘅照顧手法。所以當BB生病時，媽媽就會內疚自己冇照顧好BB，好擔心BB嘅身體出現問題。只要BB有少少鼻水、咳都足以令媽媽緊張不已，即刻急不及待帶BB睇醫生、食藥、甚至試各種偏方希望令BB快啲好返，其實有時小病可以刺激BB嘅免疫系統，增強BB抵抗力。