小朋友揀飲擇食 8個方法引起小朋友對食物興趣

當小朋友踏入幼兒階段，開始展現出對各種食物嘅喜厭程度，面對鍾意嘅食物會密密食、如遇到家人出手阻止就用哭喊抗拒；面對唔鍾意嘅食物只願意食少少、甚至食一啖都唔肯，令一心希望小朋友可以均衡飲食嘅爸爸媽媽甚感頭痛！其實小朋友唔鍾意食某種食材，可能係未試食過或覺得嗰樣食材外貌唔吸引、質感唔好、唔好食⋯⋯爸爸媽媽可以試下呢8種方法改善小朋友偏食嘅習慣。

1.每一正餐都提供多種食物

安排有多過一個菜式選擇，包括一啲孩子鍾意嘅食物同未試過嘅新食物，令小朋友可以食飽之餘，同時又能夠接觸新食物。

2.同小朋友一齊選購食物

畀小朋友喺合適嘅食物範圍內自由選擇。例如媽媽可以同小朋友講：「菜心、西蘭花同南瓜都好新鮮，不如你揀一樣做晚餐嘅餸吖！」

3.畀小朋友參與準備食物嘅過程

可以請小朋友幫手清洗蕃茄同擺放餐具。

4.從食物外觀著手

顏色鮮艶嘅菜式同形狀小巧嘅食物都可以引起小朋友對食物嘅興趣。

5.令食物變有趣

預備健康的調味醬汁來沾蘸食物，如乳酪，自製的蕃茄醬、果蓉。這樣會使食物變得有趣，更可鼓勵小朋友多吃蔬菜。

6.改變煮食嘅方法

將食物整成容易接受嘅質感，例如有啲小朋友唔鍾意食烚蛋，爸爸媽媽可以嘗試改整蒸水蛋或煎蛋。

7.畀小朋友重複接觸同一樣食材

就算小朋友抗拒新食物，爸爸媽媽都要耐心畀小朋友經常接觸，可能需要重複多達10-15次，小朋友先會慢慢接受。

8.鼓勵小朋友接觸食材

將食物放喺小朋友面前，鼓勵佢摸、嗅、舔或品嚐，但千祈唔好強迫小朋友去做。

Text: Mami Editorial

Source：衛生署

Photo Source：Pinterest