由陣痛到生完BB要埋身餵奶 產前產後都挑戰媽媽體能

陣痛咗大半日，又經歷埋痛苦嘅生產過產，媽媽早已經大汗淋漓、身體疲累不堪。擁抱住懷中嘅小寶貝，媽媽以為終於都可以返去病房瞓個好覺，第二日帶埋小寶貝出院返屋企。點知返到病床上只係閉目咗一陣，話咁快姑娘就入嚟叫你起身餵BB飲奶，呢個時候先知，原來媽媽嘅辛勞係由呢一刻開始，媽媽真係唔易做㗎！

1. 餵奶

初生BB出世後，媽媽就要開始為BB準備第一餐「黃金初乳」，將豐富抗體送畀BB。由於母乳消化得快，所以每隔2至3個鐘需要餵BB一次，確保BB唔會餓親。雖然BB喺出世後頭一日仍會依靠體內嘅儲備，對母乳需求冇咁大，但姑娘為咗令BB學識吸啜母乳，仍會每隔一段時間要求媽媽親餵BB，媽媽亦會習慣袒胸露乳畀唔同姑娘睇，已經攰到咩都冇所謂喇！

2.掃風

餵完奶後要幫BB掃風，呢個動作亦係相當唔易做！因為有啲BB係特別難掃風，可能需要轉換唔同手法，掃足半個鐘先可以令BB打嗝。然後媽媽可能抖一陣或食餐飯，就要準備餵BB食下餐奶。

3. 換片

BB食飽後就需要換一塊乾淨嘅尿片，以保持乾爽、防止皮膚敏感而變紅。

4.泵奶

產後第2至3日，媽媽嘅乳房會開始上奶而變得又硬又痛，呢種刺痛感甚至超越生仔嘅痛楚！但當BB啱啱食飽、瞓咗或唔肯埋身食奶時，媽媽唯有自己忍痛手擠或用奶泵將奶水排出！由於呢個時候，乳房未知要製造幾多奶量，所以媽媽都要持續每隔2至3個鐘親餵BB後將剩餘奶水排空，以維持奶量、防止奶水濟留而引起乳腺阻塞。

5.安撫BB

當媽媽以為BB啱啱飲完奶、掃咗風、換埋片，應該有至少2個鐘可以眠一眠嘅時候，BB唔知點解忽然喊起上嚟，媽媽又要再抱返起BB安撫一番，直到BB唔再喊為止。當想放返BB落床嗰陣，BB又再爆喊，媽媽無奈下唯有一直抱住BB，唔單止冇得瞓，BB亦有返咁上下重量，令媽媽抱到雙手非常酸痛。

以上嘅5件事足以用盡媽媽一日24小時，所以唔好以為媽媽生完BB淨係餵奶、食飯同瞓覺好嘆呀！事實係BB瞓你都冇得瞓，就算有得瞓都唔會超過半個鐘呀！而新手媽媽都係呢個時候先知，原來做媽媽係好辛苦，仲會特別掛住自己阿媽，想返去好好孝順佢！

Text: Mami Editorial