BB唔肯飲奶 3個方法應付厭奶B

喺出世後頭3個月，明明BB好鍾意飲奶，每次都一定會將奶一滴不漏咁飲晒。但唔知點解踏入第4個月之後，BB常常飲剩好多奶，有時仲好似對奶產生厭惡感，一見到奶樽就狂喊不止，仲會出手打開，令爸爸媽媽非常頭痛！呢啲情況下嘅BB，好有可能係踏入厭奶期！

BB嘅厭奶期一般發生喺第3至4個月，會維持大約1至2星期左右。BB會表現得精力充沛，只係變得唔想飲奶，如果爸爸媽媽觀察BB一段時間後，覺得BB冇肚仔唔舒服或肚屙等腸胃問題，可以試下用呢3個方法去搵出BB唔想飲奶嘅原因，作出改善而令BB重新愛上飲奶。

1.改變飲奶嘅環境

BB嘅各種觸覺開始變得敏銳，而且會對新嘅事物感興趣，所以好容易會被外間各種事物吸引而令佢哋分心。為咗令BB可以專心飲奶，爸爸媽媽可以喺BB飲奶時，熄電視或音樂，令BB可以喺一個安靜、不受打擾嘅環境下飲奶。

2.少食多餐

將每餐奶量調低至平時嘅1/2左右，按原本嘅時間進食，如果BB平時用30分鐘就飲完奶，喺BB厭奶時一樣最多畀BB飲半個鐘，唔好因為BB未飲晒就延長時間迫佢飲晒樽奶為止，因為咁有機會令BB更抗拒飲奶。

3.改變餵食方法

爸爸媽媽可以嘗試改用湯匙餵BB飲奶，令BB覺得好有新鮮感，而再次愛上飲奶！

Text: Mami Editorial