又尷尬又難受 3個產前檢查令孕媽媽怕怕

喺整個懷孕期裡面，孕媽媽都需要面對各種產前產後檢查，有時難免要面對被男醫生檢查私人部位，當遇到下面呢3種檢查時，更令孕媽媽大感怕怕！

1.被男醫生觸診私人部位

而家好多婦產科醫生都係由男性擔當，當孕媽媽去做產前檢查或急診時，難免都需要被男醫生進行觸診，如觸摸乳房或用手指伸入陰道內檢查。由於要被陌生男人觀察及觸碰重要部位，令好多媽媽喺心理上感到極大負擔。

2.陰部超聲波

喺懷孕初期，腹部超聲波未必可以檢查到胎兒，所以醫生會選擇用陰道超音波嚟做檢查。醫生會先喺陰道超音波嘅探頭塗上凝膠，然後放入陰道內，不斷移動位置去檢查唔同嘅部位。如果醫生嘅動作較大或粗魯，會令孕媽媽有感探頭喺陰道內「鑽嚟鑽去」，唔單止喺生理上會感到非常唔舒服，心理上亦會有被冒犯嘅感覺。

3.鴨嘴鉗檢查

簡直係孕媽媽們嘅噩夢！鴨嘴鉗亦即係陰道擴張器，醫生會將一個好似鴨嘴嘅工具放入孕媽媽嘅陰道，然後調校上下兩片「鴨喙」嘅度數，將陰道口撐開，令醫生可以睇清楚子宮頸，以及用工具拎走一啲分泌物進行化驗。由於陰道口被撐開嗰陣，孕媽媽都會感到劇烈痛楚，事後亦會有少量血流出，所以令好多媽媽都猶有餘悸！

Text: Mami Editorial

Photo Source: Pinterest