放下面子 3個成為爸媽後會做嘅低能行為

明明自己本身係說話唔多、不苟言笑嘅一個人。但當BB出世之後，姑娘一句「BB鍾意聽人講嘢呀！」就為自己開展咗第二人格，做盡各種低能行為只為搏BB一笑，以下呢3種行為，爸爸媽媽又有冇做過呢？

1.幫BB配音

BB本身唔識講嘢，爸爸媽媽見自己成日同BB講嘢又得唔到回音時，就索性自己代入埋BB嘅角色，幫BB配音去回應返自己，實行「自言自語」，仲大講疊字同BB話！有時見BB做啲搞笑行為，都會自動腦補BB諗緊咩，講到好似真嘅一樣，然後自己笑一餐。

2.扮鬼臉哄BB

有時會覺得扮鬼臉、掩臉放開呢啲動作好低能，又唔知個笑點喺邊，本來都好不屑做呢啲動作。偏偏BB又真係好鍾意呢啲動作，一見到就會笑到好誇張、好大聲，令爸爸媽媽都驚呆了！為咗多啲聽到BB治癒嘅笑聲，爸爸媽媽都會時不時扮鬼臉去哄BB開心。

3.大唱走音歌

本身係五音不全或對音準好執著嘅爸爸媽媽，有時都要為哄BB開心而即席作歌詞唱兒歌，明明走晒音都要唱，真係要幾難聽有幾難聽！好在BB係一位最佳聽眾，無論你唱成點佢都會對著你笑，真係畀足支持同鼓勵你呀！想唔唱都唔得啦！

Text: Mami Editorial