媽媽嘅產後煩惱 甩頭髮點算好？

生完BB後，唔少媽媽都會深受各種產後問題嘅困擾，其中最令媽媽難過嘅莫過於係脫髮問題，隨手梳一梳頭髮，都會有一大把頭髮跌落嚟，真係嚇到心都囄一囄呀！

究竟點解產後會甩咁多頭髮呢？ 原來係因為懷孕時孕媽媽體內雌激素量增多 ，會留住本來應該脫落嘅頭髮，令到呢啲頭髮「逾期居留」。當BB出世之後，孕媽媽體內雌激素含量會恢復到懷孕前嘅狀態。除咗正常脫落嘅頭髮外，連之前「逾期居留」嘅頭髮都會脫落，而新嘅頭髮又未能夠及時生出嚟，所以就會出現產後甩大量頭髮嘅現象。

產後媽媽平日亦可以做以下3件事改善脫髮問題：

1.補充營養素

頭髮最重要嘅營養來源係蛋白質，如果媽媽喺平時嘅飲食缺乏蛋白質、鐵丶維生素A等營養素，都會令到頭皮營養不良而造成脫髮，建議可以食返多啲牛奶、雞蛋、魚、瘦肉等。另外中醫認為腎主毛髮，具有補腎功能嘅「黑色食物」亦有利卡養髮，建議多食黑芝麻、黑棗、黑豆、黑米、黑木耳。

2.充足睡眠

產後要捱夜同照顧BB令媽媽壓力大增，有機會加重產後媽媽嘅脫髮問題，建議媽媽真係好攰嘅話，不妨趁BB瞓覺時自己都眠一眠，請家人或另一半幫手處理家務，令自己可以好好休息一下，有助釋放壓力。

3.按摩頭皮

可以刺激頭皮毛囊，促進血液循環，從而紓緩脫髮現象。

Text: Mami Editorial