產後幾耐先會恢復月經周期呢？

有唔少媽媽喺生完BB之後，好多時都會有個疑問：「明明生完BB都已經過咗幾個月？究竟月經幾時先會嚟呢？」原來月經再次嚟嘅時間，同媽媽餵哺母乳係有好大關係。

如果媽媽冇餵哺母乳，月經通常會喺產後第4至6星期內出現；但如果媽媽繼續餵哺母乳，體內嘅泌乳激素會升高、抑制排卵功能，所以會喺較後嘅時間先會恢復月經，普遍喺產後第2至18個月內任何時候恢復，但亦有啲媽媽喺整個哺乳期都冇月經嚟，所以各位媽媽都唔駛太擔心。

不過媽媽要注意，即使月經仲未恢復，媽媽嘅身體亦可以開始排卵，所以一樣有機會受孕，懷孕嘅機會大概有2至5%，所以穩陣起見，媽媽同另一半進行性行為時仍然需要採用可靠嘅避孕方法。

產後頭幾次月經有可能會同媽媽懷孕前嘅有分別，例如經血流量較少，行經日數較短。但如果有大量或持續不停出血，尤其出現下腹不適或疼痛嘅症狀，有可能係因為產後胎盤、胎膜等組織殘留喺子宫之內或子宮發炎，媽媽必須儘快約見醫生檢查。

Text: Mami Editorial

Source：衛生署