順產完都會有意外 5個引起產後出血嘅原因

喺BB出世之前，個個媽媽都一心以為只要捱過咗十級生產痛，就一天都光哂。但對某啲媽媽嚟講，理想同現實總係兩回事，唔單止係生產過程中狀況百出，就算順產過程非常順利，都有可能喺產後幾日先至大出血！原來係胎盤未排清，有部分胎盤殘留而引起嘅產後出血！

產後出血係指產後出血量大於500㏄以上。大多數發生喺啱啱生完BB嘅24小時內，醫學上稱為「立即性產後出血」；但係有時產後出血都可能喺產後2個月內發生，稱為「延遲性產後出血」。

通常造成產後出血嘅原因有5項：

1.子宮收縮無力

這是產後出血最主要的原因，通常有胎兒體重過重、多胞胎懷孕、羊水過多、麻醉藥物、產程過長、前胎有子宮收縮無力等嘅病史。由子宮收縮不全所引致嘅大量出血，通常醫生會處方「子宮收縮劑」作藥物治療，仲會用手按摩子宮，直到子宮變硬為止，目的係加強子宮收縮功能。

2.產道裂傷

產後大出血嘅另一個常見原因，主要係順產後造成嘅陰道、會陰或子宮頸裂傷出血。就算喺縫合傷口後，外觀上冇再出血，但都可能已經喺裂傷較深處形成血腫，令產婦喺產後出現唔穩定嘅生命跡象。一般醫生會再進行緊急縫合手術，甚至利用紗布壓迫傷口止血。

3.胎盤殘留或植入性胎盤、前置胎盤

有時候產後胎盤冇完全脫落，都有可能引起產後出血。通常醫生喺產後需要檢視胎盤係咪已經完全排出，如果發現胎盤唔完全，或子宮收縮良好、產道無裂傷跡象，懷疑有副胎盤存在嘅可能，需要用超音波檢查，用藥物治療或施行刮宮手術。

4.子宮破裂

子宮曾經做過手術、前胎係剖腹產而呢一胎係順產，或係生產時不當嘅腹部加壓助產，都有可能造成子宮破裂。子宮破裂可以引起嚴重腹腔內出血，如果冇及時發現治療，致死率相當高。

5.凝血功能障礙

某啲產婦因為自身疾病需要服食抗凝血劑，或有先天凝血病變如血友病、血小板過少症，都會增加產後出血嘅風險。

「產後大出血」由少量演變到大量止唔住咁失血，有時速度係可以好快，所以一定要立即判斷同處理，如果出血情形嚴重，有可能令到產婦凝血功能障礙、休克，甚至死亡。所以一定要搵出出血嘅原因同緊急處理，必要時會切除子宮止血，以挽救產婦嘅性命。

Text: Mami Editorial