一郁就醒 BB夜晚唔肯瞓點算好？

BB通常喺三個月大之前，睡眠時間都係冇規律，大約一半嘅睡眠時間都係淺睡狀態，所以好易會被周圍嘅聲音驚動。到咗三個月大之後，BB開始會有長啲嘅睡眠時間。不過，瞓幾多次覺會因應BB嘅脾性唔同而因人而異。如果想BB易啲瞓，不妨參考下呢3個方法。

1.令BB有睡意

日頭唔好強迫BB瞓覺，要等到當BB眼皮垂下、將頭或面喺你身上擦或打呵欠時，先畀BB瞓覺，而BB每次瞓覺嘅時間唔好超過3個鐘，夜晚會比較易瞓啲。

2.營造一個容易入睡嘅環境

室內嘅溫度要適中，衣物同被單要適量，最重要就係令BB學識分辨日頭同夜晚；BB喺日頭清醒嘅時候，光線要充足，瞓覺或夜晚嘅時候就要將燈光調暗。有啲BB瞓睡醒會因為怕黑而喊，爸爸媽媽可以開一盞小燈。其實BB喺日頭瞓醒嗰陣，應該盡量多啲陪BB玩，等BB唔會因為無聊而瞓得太多，影響夜晚嘅睡眠質素。

3.建立睡覺嘅常規

喺夜晚餵BB飲奶、掃風、換片之後，可以將BB放到BB床上，同佢傾計或唱催眠曲，等BB平靜落嚟，然後慢慢瞓著。咁做係令BB將日常一啲活動同瞓覺聯繫起來。每次做完呢啲活動之後，盡可能喺BB開始有睡意時就將佢放喺BB床，等佢自己瞓覺。

Text: Mami Editorial

Source：衛生署