BB抬頭淨係肯擰去同一個方向？ 教你點樣判斷BB係咪嬰兒斜頸症

BB到咗3個月，會開始識得抬起頭仔，但如果爸爸媽媽發現BB嘅頭部經常擰向一邊，瞓覺嗰陣又慣常擰去同一邊瞓，每次嘗試將BB個頭擰向另一邊，BB就會大喊嘅話，BB有可能係患上斜頸症。

一般都可以喺BB出生後2至10周左右發現，爸爸媽媽可以觀察BB有冇下面幾項症狀，如果有嘅話可以帶BB去母嬰健康院請駐院醫生作進一步診斷治療：

1.感覺BB嘅頭歪向一邊

2.平躺時，BB頭傾向轉一邊

3.坐著時，頭固定轉向一邊

4.吸引BB左右望，發現BB頭頸部轉動有困難

5.喺寶寶頸部摸到硬塊

每1000名新生兒當中就大約有4個有斜頸症狀，係常見嘅兒科疾病之一，通常發生喺嬰幼兒身上。當BB頸部嘅單邊肌肉緊縮，不易伸展時，就會造成斜頸。先天性斜頸斜頸症無法預防，早喺BB仲喺媽媽個肚裡面嘅時候已經形成，原因目前未明，只要及早發現及治療，幾乎都可以恢復正常。目前治療斜頸症嘅方法有物理治療同外科手術。部份小朋友會隨著成長，肌肉硬化程度會慢慢減輕，所以年紀小嘅病人可先嘗試用物理治療，如：按摩、熱敷、運動等。

如果物理治療無效、1歲以後仍有明顯硬化嘅頸部肌肉，就需要施行手術治療。

Text: Mami Editorial