父母必學幫BB剪指甲嘅4個小技巧

初生BB會成日搲臉，又唔識控制力度，好多時都會搲到塊臉有好多條血痕，睇到爸爸媽媽好心痛！除咗可以幫BB戴手套外，爸爸媽媽都要每隔2至3日幫BB修剪一下指甲，如果唔知點幫BB剪指甲嘅話，不妨參考下呢4個小技巧。

1.待BB熟睡時剪

BB清醒嘅時候會郁來郁去，而且爸爸媽媽捉實BB嘅手指會令BB受驚掙扎，除咗容易屈親BB嘅手指，亦容易剪傷BB，所以最好等寶寶熟睡嘅時候先剪。

2.用嬰兒指甲鉗

BB嘅手指甲非常細小，爸爸媽媽最好準備嬰兒專用嘅指甲鉗為BB剪指甲，嬰兒指甲鉗嘅頂部通常係鈍頭，無咁容易剪傷BB。

3.剪完一隻換一隻

建議家長最好先將BB五指分開，再捉住佢一隻手指嚟剪，千祈唔好一排手指咁握住，因為如果小朋友喺呢個時候亂郁嘅話，就好易誤剪傷其他指甲。

4.避免剪得太入肉

幫BB剪指甲時要留一啲白邊，唔好剪得太深入，唔係就好易造成「嵌甲」，嵌甲會令BB指甲變形，仲會傷害到指甲周邊嘅皮膚，有機會造成甲溝炎。

Text: Mami Editorial

Photo Source:家庭健康服務、Pinterest