停餵母乳 媽媽最唔捨得同BB嘅親密時光

當BB呱呱落地、姑娘將BB放喺媽媽心口嘅一刻，媽媽同BB終於第一次感受到由對方肌膚傳黎嘅溫熱感。期昐十月，終於昐到嘅親密感真係足以令每個媽媽畢生難忘！每次親餵母乳，媽媽都可以享受同BB嘅2人世界；即使係瓶餵，只要見到BB飲母乳，都會有莫大嘅滿足感。雖然偶爾會遇上谷奶、塞奶、手痺嘅情況⋯⋯令大部分媽媽好想放棄，但當真正要放棄嘅時候，媽媽們先發覺，原來自己真係好唔捨得呢段母乳經驗。

媽媽食任何食物之前，都要先考慮到會唔會對BB造成敏感、熱氣，或口味太重令BB唔鍾意⋯⋯但當食咗營養豐富嘅美食嗰陣，又會開心BB都有好嘢食。

當BB扭飲奶嗰陣會喊唔停，但當見到媽媽乳房或奶樽時，會急不及待雙手抓住唔放，睇到BB用力吸啜、最後滿足咁瞓著嘅時候，媽媽都會有莫大嘅滿足感。

當一屋所有人都要爭住同BB玩嘅時候，媽媽可以每日有幾節親餵BB嘅時間，享受同BB 2人世界，不受任何騷擾。

經過長時間嘅親餵，媽媽同BB已經培養出深厚感情，BB自然會痴媽媽多啲，亦只有媽媽先最能夠安撫BB。

當BB逐漸長大，母乳已經唔係BB嘅主要糧食，逐漸變成副食，甚至要戒除嘅時候，呢段美好嘅母乳經歷都會變成過去，所以媽媽們請好好珍惜可以餵哺母乳嘅日子。

Text: Mami Editorial