胎教真係有用嗎？

當孕媽媽開始感受到胎動之後，都會急不及待同BB互動，甚至會不停講故事或播放音樂，同BB進行「胎教」，究竟「胎教」係咪真係有用呢？

事實上，有好多科學研究都證明20周後胎兒嘅聽覺已經發育成熟，能夠對外界刺激產生反應，而且可以聽到並分辨出媽媽嘅聲音。

德國醫學期刊曾做過實驗，喺胎兒嘅聽覺發育成熟後，將耳機靠近孕媽媽嘅肚皮上，突然將聲音調到最大，胎兒會突然震動一下，證明胎兒能夠受到聲音刺激而作出反應。

但由於隔著羊水和子宮，母體內充斥著媽媽嘅心跳聲、腸胃蠕動聲、血液流動聲……而呢啲聲音遠遠大過由母體外傳來嘅聲音，所以胎兒聽到嘅聲音並唔清楚，亦缺乏辨認悅音同噪音嘅分辨。所以如果父母渴望喺胎兒時期就令BB可以「贏在起跑線」上，做個小小莫扎特嘅話，基本上冇咩可能。

之但係，如果爸爸媽媽同胎兒多說話同互動嘅話，胎兒係會認得爸爸媽媽嘅聲音，即使出世後都會有熟悉感。所以，當BB喊嘅時候，聽到爸媽嘅聲音會更容易減低恐懼、不安感覺，更容易冷靜！

所以爸爸媽媽應該期待嘅胎教係將父母嘅幸福感傳畀胎兒，當父母用溫柔、開朗嘅聲線同胎兒講嘢，胎兒亦會感到愉快。

Text: Mami Editorial