懷孕初期周身唔舒服 7個症狀逐個數

有咗BB之後嘅頭3個月，媽媽身體嘅各個器官都需要作出改變去孕育肚裡面嘅小寶寶。身體器官接二連三咁改變運作，亦都會影響到媽媽嘅心理同生理，辛苦程度直逼孕後期！以下呢幾項症狀，媽媽又覺得邊樣最困擾你呢？

1.冇月經：

小編覺得冇月經算係咁多症狀裡面最好嘅一項，又唔駛擔心冇帶M巾出街，更加唔怕流量多時會整污糟條褲，都算係懷孕中嘅小福利。

2.體溫高：

身體排卵後因黃體激素分泌增加，令基礎體溫上升。媽媽成日都覺得身體好似微燒咁，周身唔自在！

3.噁心：

呢個症狀因人而異，有啲人只係冇咩胃口，有啲人就會聞到某啲氣味而孕吐。

4.時常感到疲倦：

成日都會覺得好攰、好眼訓，但就點訓都覺得唔夠，做咩都提唔起勁。

5.乳房腫脹不適：

乳房腫脹、發癢，而且乳頭顏色會加深，不過胸部升級咗都會有啲開心！

6.腹痛、腰酸：

因懷孕時的賀爾蒙及子宮變化，容易造成腹痛、腰酸，成日都要攬住熱水袋紓緩下。

7.懷孕心理上變化：

因為賀爾蒙的變化導致孕婦心情起伏不定，個人成日都忟忟憎憎咁，好易發嬲同唔開心，嚴重仲可能會有「產前憂鬱」嘅情況。

Text: Mami Editorial