7坐8爬9長牙 BB跟唔上進度點算好？

古時有句話：「一視二聽三抬頭，四握五抓六翻身，七坐八爬九發牙，十捏周歲獨站穩。」用嚟概括BB喺唔同時期嘅成長狀況同行為。有D爸爸媽媽可能會好緊張BB已經到咗某個月齡但仲未有上述嘅行為，擔心係BB發展遲緩。

事實上，每個BB都係獨一無二，佢地有自己嘅成長進度，可能會較早或較遲出現上述嘅行為，並唔一定要依照呢個發展準則！上一代流傳「7坐、8爬、9長牙」嘅通則，係因為早期保健知識唔普遍，所以先有呢句口語畀照顧者作為參考，而唔係所有BB嘅發展都會跟呢個時間順序進行。

所以家長要明白每個BB嘅發展時序都唔同，只要生理構造發育成熟，自然就可以做到某D行為，例如大腿肌肉夠力，自然就會走，尤其係爬嘅階段，只要BB發展成熟，就自然會做，而唔好勉強BB提前發展去做。

而每次帶BB去母嬰健康院打針，姑娘亦會跟進同評估BB嘅發展進度，如家長有任何疑慮，都可以同姑娘溝通，尋求協助。

Text: Mami Editorial