大台熱門劇集《BB來了》 為媽媽們平反 阿媽唔易做 甘願為子女放棄一切

大台劇集《BB來了》每集都有唔同嘅共鳴位，睇到一眾媽媽又喊又笑，而近哩兩集竟暗暗帶出咗三個為媽媽平反嘅信息，你又睇唔睇到當中有咩含意呢？

為子女而放棄自己畢生嘅事業

劇中，恬兒（李佳芯飾）為女兒允豬而決定放棄時裝事業，但其上司就覺得，全職媽媽唔單止係黃面婆、全日只係幫小朋友執屎執尿、易同社會脫節，仲要攤大手板問老公拎錢，根本就係寄生蟲。

有邊個女人想做黃面婆，奈何湊BB已經消耗大半日，連瞓覺嘅時間都無，仲邊度有咁好閒情逸致去做Faceal同化妝呢？其實做媽媽一啲都唔易，因媽媽每分每秒都係「工作」，24小時Stand by，仲要無得偷懶（如：遲到、早退、生病），但BB係媽媽嘅一切，上至瞓覺食奶下至沖涼換片，雖然每日都好似過著無限循環喪屍般嘅生活，但當手抱著BB，見到BB笑，之前嘅犧牲都唔係咩一回事；而隨著時間流逝，BB能健康快樂成長，就已經覺得即使放棄自己畢生嘅事業都值得。

母乳媽 VS 奶粉媽
劇中，恬兒同阿妙到超市購物，期間阿妙問恬兒點睇奶粉媽媽，恬兒嘅反應極大同帶少許輕視感認為奶粉媽係唔夠信心、決心同恆心。

認真講，有頭髮邊個想做癩痢，每個媽媽都知道母乳對BB好有營養，但往往有部分媽媽因身體又或者其他情況唔容許而要被逼餵奶粉，哩啲媽媽心裡已經覺得愧對BB，有深深嘅罪惡感，點解仲要畀難聽嘅說話佢哋聽呢？大家都係媽媽，對仔女嘅愛都係同樣偉大㗎。

仔大女大 老來先再為自己追求夢想

劇中，自稱為「湊仔聖手」嘅月蟬，難得女大又做咗人媽媽，好聽啲嘅就叫做無咩牽掛，就倒頭繼續去追求自己嘅夢想，雖然年紀就已達黃昏，但哩一切都只係為咗證明自己仍然係有用之人。

媽媽將最青春年華嘅時間全奉獻畀屋企，捱到仔大女大，先真真正正有自己嘅時間，作為仔女嘅不如鼓勵媽媽去做想做嘅事，因為媽媽值得再次擁有體驗青春嘅機會。

Text: Mami Editorial
Photo Source: TVB《BB來了》截圖