產後抑鬱唔係媽媽獨有 新手爸都有機會 細數5點會導致爸爸患上產後抑鬱原因

最近大台劇集《BB來了》中，葉致廷（黎諾懿 飾）夾係三個女人中間，再加一個BB，可謂壓力完全爆燈。其實每當BB出世後，家人往往會將注意力放到產後媽同BB身上，從而忽略新手爸爸都有相同嘅困擾，而研究調查發現，每十個新手爸爸中有一個面臨抑鬱症。

1. 意外懷孕：
就如劇中，致廷同恬兒意外懷孕仍未有心理準備迎接BB來臨，而當BB出世後，生活完全被打亂，情緒當然會受到影響。

2. 伴侶壓力：
夫妻雙方嘅情緒係會互相感染，所以媽媽產後護對四周事情十分敏感，又或者情緒難以控制的話，都有機會令爸爸出現焦慮、抑鬱嘅情況。

3. 情感壓力：
因BB出生後，家人嘅重心轉到BB同媽媽身上，會忽略新手爸爸嘅感受，甚至無意中令新手爸成為大眾嘅出氣袋，就如致廷係眾人嘅出氣袋一樣，做任何事都係錯，完全不知所措。

4. 經濟壓力：
BB出世前，產檢、照結構、做測試等全都係錢；出世後，尿片、奶樽、奶咀、衫仔、床仔等，每件BB必用消耗品等都係不可或缺，所以作為家中嘅經濟之柱，壓力方面當然倍增。

5. 時間壓力：
未有BB嘅時候，自己時間自己安排，又或者同太太過下二人世界，但當BB出世之後，爸爸每朝都要外出工作，夜晚就可能要同媽媽輪流照顧BB而導致嚴重睡眠不足，搞到壓力無發釋放，從而導致壓力爆煲。

爸爸都係人，都需要時間去適應BB嘅來臨，作為另一半同家人，都應要顧爸爸嘅感受㗎！

Text: Mami Editorial
Photo Source: TVB （劇集《BB來了》截圖）