就算幾辛苦都好～小朋友5個小行為都令到媽媽甜到入心

無論係全職媽媽定在職媽媽，都各有難處，一樣咁辛苦。小朋友係知道嘅，所以佢地每日都會為媽媽做啲嘢，令佢地甜入心。

1. 甜言蜜語

「媽媽，我好鍾意你架！」同埋「我愛你呀媽媽！」呢兩句簡直係殺手鐧。無論係幾時聽到，都甜到入心。

2. 錫錫咀

同囝囝囡囡鍚鍚咀嘅時間，真係好甜好甜，而且要珍惜呀，大個左就唔肯鍚鍚咀架喇。

3. 將鍾意嘅嘢分享畀媽媽

啱啱開始適應左番學嗰陣，當佢講到幼稚園好好玩，下一句係「如果媽媽都可以一齊番就好喇～」。知道佢會想同媽媽一齊去佢覺得開心好玩嘅地方，嗰下個心真係甜甜地。

4. 媽媽病時特別乖

有無留意到當媽媽唔舒服嘅時候，小朋友會比平日乖啲，靜啲，煩少啲？病左喺梳化或者床休息嗰陣，小朋友身型細小，但拎張又大又長嘅被過黎，怕媽媽凍親嘅呢一刻，真係好窩心。

5. 揼揼背

見到爸爸或者媽媽趴喺梳化休息，就會走埋黎打打，原來係知道我地背脊痛，想做小小按摩師，真係抵鍚呀。

Text: Mami Editorial