全城熱談媽媽共鳴劇 貼地教你長胎唔長肉成新一代潮媽秘訣

大台劇集《BB來了》首集一出，已成為全城熱談，媽媽每晚必定追來睇嘅劇集。第一集就講中婆媳之間關係同女人意外懷孕怕生仔嘅問題，但噚晚（第二集）一開始就已經同大家分享時下最熱門嘅話題就係準媽媽佗B長胎唔長肉嘅秘訣。

劇中嘅唐恬兒（李佳芯 飾）絕對係愛靚一族，即使係佗住BB都絕唔會跟上一代嘅「養肥豬」安胎法（即係乜嘢補品都食，有咁補得咁補），所以如果想達成長胎唔長肉，做新一代潮媽嘅話，就必先要從生活細節入手。

正如恬兒話「飲食應該要自律」！無錯，係成個孕期，孕媽每日只要增加額外大約300卡路里（即每天總共吸收約近1,800卡路里），再配合適量運動就可以做個出色潮媽。

可能你會問，點樣先算係自律飲食？其實孕媽係食物方面最好低鹽、低油和保持營養均衡，以下五種都係有營養而又唔易肥嘅食物，啱晒一眾孕媽。

水煮雞蛋
眾所周知，雞蛋含有豐富蛋白質及人體所需嘅氨基酸，同人體內嘅蛋白質相近，有助胎兒成長既同時，亦可令孕媽皮膚又白又滑，但最好以水煮方法烚熟，唔好食太多蛋黃，以免吸收過多油分和膽固醇。

焗三文魚扒
大肚媽媽雖然唔食得魚生，但有三文魚扒頂上一樣好味，皆因三文魚含豐富DHA，有助降膽固醇，最好嘅食法就係焗，因魚扒本身就會分泌油分，所以就算醃好再焗，都一樣甘香，但如果無焗爐，可以少油煎熟亦得，啱晒孕媽作主餐。

水煮麥皮
麥皮含豐富水溶性纖維同非水溶性纖維，屬低卡路里嘅澱粉質食物，有降膽固醇及減重功效且飽肚，係早餐嘅不二之選，但切記唔好食含高糖分嘅麥皮，最好選無糖無添加。

高鈣牛奶
孕媽媽懷孕期間需要大量嘅鈣，而營養豐富嘅牛奶就含有豐富鈣質同蛋白質，有利BB骨骼同腦部發展，選擇高鈣低脂牛奶就能減低攝入過量脂肪。

無鹽紫菜
紫菜含大量嘅鈣、碘、磷、鐵等無機鹽和微量元素，有助BB嘅大腦發育，不過就唔好食油炸／加入大量鹽花嘅紫菜，同埋記住少食多滋味，隨口當零食就可以。

此外，適量帶氧運動如：游泳、水中健身運動、散步、Pilates、孕婦瑜伽等均可以增強心肺功能同血液循環，既可以減低妊娠糖尿病嘅風險，預防懷孕期間嘅痛症同不適，有利胎兒發育，有助輕鬆順產。

Text: Mami Editorial
Photo Source: TVB