滴滴皆辛苦！餵母乳5大難處 以為好簡單 其實一啲都唔易

最初以為係好自然嘅事，只要瞓少啲就得，仲唔洗洗奶樽，快靚正，順利嘅話，的確係咁。但其實好多新手媽媽，揀左呢條路之後，先知道原來一開始已經難關重重。

1. 谷奶痛過生BB

相信餵過母乳嘅媽媽都好贊成呢句說話。谷奶脹痛真係痛過生仔，簡直係可怕！又硬，又痛，又怕會變成乳線炎。捱住痛按摩再一邊泵奶，又痛又擔心，嗰種心情，用文字形容唔到，嗰種痛，好似十級痛以上。

2. 返工分秒必爭

產假過後，想繼續比最好嘅BB，就要喺公司定時泵奶，日日番工好似去爬山咁，帶足一副「裝備」（泵、奶樽、冰袋同冰種）。公司待遇較好嘅，可以堂堂正正咁去泵奶，但相信大多數媽媽 ，都係食飯時間，快快手食完個飯，飲一大樽水，就即刻沖去泵奶。

3. 冷言冷語一堆堆

「BB係咪唔夠飽所以喊？」，「我見朋友個BB食奶粉肥肥白白」。說者無心，但喺媽媽咁辛苦努力嘅時間，真係好需要正面嘅支持。有時候，一句「辛苦你了」，或者「多啲休息，有咩我可以幫手呀？」，可能會令媽媽舒服好多。

4. 晚晚同睡魔搏鬥

密密餵，密密泵，日夜無停。就算BB唔食，都要泵奶，先可以維持住奶量。爸爸們，你地其實可以起身斟杯水比媽媽，或者幫手同BB掃風㗎。

5. 身材走樣危機

一定係每個媽媽都會擔心嘅事，但比起以上四點，呢一個難關已經係最無難度。因為為左BB，媽媽一早已經豁左出去喇。

雖然難關重重，但望住BB食飽飽嘅可愛笑容，再辛苦都值得。偉大嘅媽媽們，加油呀！

Text: Mami Editorial