肚仔脹谷谷 BB喊不停點搞 教你4招舒緩BB腸胃不適嘅妙法

自BB出世，媽媽嘅心思可以話係全部都放晒係BB身上，但有時唔知點解，BB總係長喊唔停，無論點氹都唔得，如果係咁嘅話，有可能係肚脹谷、消化不良等問題，但媽媽唔使怕，依家即教你四招舒緩BB腸胃不適嘅妙法。

Photo from Photo From Presslogic

BB要保暖
保暖可以幫BB放鬆身體，令腸胃唔再緊繃，肚仔內嘅脹氣自然容易排出。要幫BB保暖嘅方法好多，如媽媽可先將BB抱係懷中，然後再將身體捲縮，用體溫來溫暖BB，又或者用毛毯包裹著BB，可以包全身又或者只冚肚仔。

Photo from Photo From Presslogic

幫BB按摩肚仔

媽媽最好係BB清醒嘅情況下先幫BB按摩肚仔。按摩肚仔嘅步驟：先將BB仰卧並望住媽媽，非常輕力按順時針方向按摩BB肚仔，然後順著肚仔曲線往下拉，重複按摩數次，咁就可以幫BB排出多餘氣體。

Photo from Photo From Presslogic

幫BB做踩單車動作

可能會問，點樣幫BB做踩單車動作？具體情況同按摩肚仔差唔多，先將BB仰卧並望住媽媽，然後雙手輕輕捉住BB雙腿，再慢慢屈伸BB雙腿，好似踩單車一樣，咁就可以移動被困係肚仔內嘅氣體，從而將多餘氣體排出藉此緩解不適。

Photo from Photo From Presslogic

保持BB身體水分充足
假如BB有腹瀉情況出現，就算睇起來無食慾，都要畀BB飲多啲溫水，千萬唔好畀BB飲含糖份嘅飲料或果汁，因糖會加重脫水癥狀。除此之外，亦千萬唔好亂餵止瀉藥物畀BB，因止瀉藥會減慢腸道蠕動，讓病菌滯留係腸中繼續繁殖，令情況變得更壞。

倘若，BB情況無改善，媽媽就要帶BB去睇醫生啦！

Text: Mami Editorial