唔一定要嚴厲教導！4種唔同獎勵令小朋友做得更好

其實唔一定要用嚴厲或惡嘅方式教小朋友，想鼓勵小朋友做得更好，出動獎勵嘅方法會發現佢地更樂意去做。以下有4種唔同種類嘅獎勵方式，可以畀大家參考下：

玩樂型：

佢可以要求爸媽陪佢一齊大笑十秒，或者要爸媽做個鬼臉～

又或者帶佢地去鍾意嘅地方，例如公園、泳池、圖書館、遊樂場等。

.

溫暖型：

一個擁抱、一個錫錫、用咭紙剪一個心型送畀佢地。女仔嘅話，可以應承親自幫佢地紮頭髮。男仔嘅話，陪佢地天馬行空咁砌積木，玩足一個晚上。

.

簡單型：

簡單一句「你頭先咁做，做得好好，繼續努力呀！」，或者「你做得好好，媽媽因為你做得咁好，都覺得好開心呀！」，已經係佢地嘅超級動力來源。小朋友真係好鍾意得到大人嘅認同，同埋讚賞，所以認真咁去觀察佢地，然後讚賞佢地，都係一份好好嘅獎品黎㗎。

.

實物形：

獎品，即係佢地鍾意嘅嘢文具、貼紙、玩具、公仔、零食……等等。

.

其實，爸爸媽媽嘅陪伴，一定比起得到一件玩具，開心得多。對於非物質嘅獎勵，有時佢地仲覺得更加新奇有趣添。想令天真嘅小朋友開心，其實可以好簡單。不妨每種獎勵方法都用下！

Text: Mami Editorial