【6款奶樽刷實測】最平$16.58起！比較起泡、窄口入樽及清洗表現

奶樽刷日日用，媽媽最重視邊一樣？係入樽夠順、抽出唔彈水，定洗完容易沖乾淨？

MamiDaily小編自費試咗6款奶樽刷，價錢由$16.58至$59，包括海綿、尼龍、矽膠及混合刷頭款。今次由起泡、刷走蠔油、窄口入樽、刷頭沖洗，以至配件及收納設計逐樣比較，幫媽媽按屋企需要揀款。

#測試方法

今次點樣測？

• 起泡表現：每款使用1滴洗奶樽液，轉動20下，觀察泡泡數量及形態。
• 蠔油清潔：在樽身塗上蠔油，轉動2下，觀察醬料減少及殘留情況。
• 窄口入樽：使用同一個測試奶樽，觀察放入刷頭所需力度，以及抽出時有冇彈水。
• 刷頭沖洗：觀察泡泡及醬料沖走嘅難易程度，海綿款亦會按壓清洗。
• 日常設計：比較刷頭更換、旋轉手柄、細刷配件及收納方式。

蠔油有顏色，方便睇清楚刷洗痕跡；奶漬清潔效果則需要另外測試。今次各款醬料塗抹量及分布未能完全一致，因此以畫面觀察及使用感受作比較。以下價格按購買時商品頁截圖，實際售價及配件以商戶最新資料為準。

#1. Pigeon 海綿奶瓶刷$35：泡泡細密

刷頭材質：海綿＋網狀夾層
配件及設計：可旋轉手柄、可更換刷頭；不附獨立奶嘴刷
適用：玻璃及塑膠奶樽；官方列明可用於所有Pigeon奶樽

Pigeon海綿款今次起泡明顯，樽底及下半部樽壁見到較細密嘅泡泡。蠔油測試中，大片醬料明顯減少，仍有薄薄痕跡及局部殘留。

放入窄口樽時需要用力，不過抽出時未見明顯彈水。海綿吸住水同泡泡，清洗刷頭就要邊沖邊按壓，幫泡泡排出。

小編點睇？
適合鍾意海綿貼住樽壁刷洗、又重視抽出時少彈水嘅家庭。可換刷頭亦方便日後更換耗材；媽媽要預留少少時間按壓沖洗海綿。

#2. Pigeon 尼龍奶瓶刷$55：玻璃樽專用

刷頭材質：尼龍刷毛
配件及設計：可旋轉手柄；商家確認新包裝不附奶嘴刷
適用：玻璃奶樽專用

Pigeon日本官方解釋，尼龍刷摩擦塑膠樽壁時，容易造成細微刮痕，奶渣等污垢可能積聚在刮痕內，因此其他材質奶樽建議選用海綿刷。

今次尼龍款可放入窄口樽，抽出時刷毛會彈水。起泡亦明顯，不過泡泡較疏，大小泡泡混合。轉2下刷洗蠔油後，樽壁較明顯見到刷散嘅啡色薄膜。

小編點睇？
適合使用玻璃奶樽、想揀刷毛款嘅家庭。抽出時可以放慢動作；如需要清潔奶嘴內部，記得另外配細刷。

#3. Snow Bear 便攜奶瓶刷套裝$59：收納方便，難入窄口樽

主刷頭材質：TPE
配件及設計：奶嘴刷、飲管刷及收納盒
適用：官方未逐項列明玻璃／塑膠奶樽適用範圍。

Snow Bear最大特色係將清潔工具集中收納，外出或旅行時較方便帶齊。

不過主刷頭較大，今次要用手按壓刷頭先放入窄口樽，操作較費工夫。起泡較少，主要集中在樽底邊緣；蠔油測試後，仍見啡色薄膜、刷洗痕跡及較厚嘅局部殘留。

小編點睇？
適合重視旅行收納、想帶齊奶樽刷及細刷嘅家庭。使用窄口樽嘅媽媽，買前要特別留意刷頭同樽口尺寸。

#4. Youha 矽膠三件套$58：最易沖洗乾淨

主刷頭材質：矽膠
配件及設計：奶嘴刷、飲管刷、360度旋轉手柄；刷頭可拆下清洗
適用：官方稱柔軟矽膠刷頭可避免刮花奶樽，未逐項列明樽身材質。

Youha今次可放入窄口樽，抽出時膠條會彈水。起泡明顯，樽底及下半部樽壁見到大小泡泡混合，矽膠款亦可以起到泡。

蠔油測試後，樽壁見到清楚嘅刷洗痕跡，同時仍有啡色薄膜及局部醬料。清洗刷頭時，小編覺得呢款較容易沖走泡泡，唔使好似海綿款咁反覆按壓。

小編點睇？
適合想刷头清洗方便、同時需要奶嘴刷及飲管刷嘅家庭。以今次使用感受而言，小編私心鍾意呢套；抽出窄口樽時就要留意彈水。

#5. 派巴貝特 U80 六件套$16.58：性價比高！兩支主刷選擇多

刷頭材質：黃色海綿刷，以及海綿＋尼龍混合刷
配件及設計：兩支主刷及細刷配件；刷頭可更換
適用：商戶商品頁稱可清潔不同材質瓶體，未逐項列明材質。

U80係今次6款中價錢最低嘅一套，而且有兩支主刷，可以試唔同刷頭。

兩支都可放入測試窄口樽，但塞入時需要用力；抽出時未見明顯彈水。兩款刷頭起泡都較少，泡泡較薄及零散。蠔油測試中，大片醬料明顯減少，仍有局部痕跡及殘留。

收到嘅樣本接駁位同刷毛做工較粗，媽媽使用前要檢查接駁是否穩固，以及有冇突出或鬆脫部分。

小編點睇？
適合預算有限、想一次試海綿及混合刷頭嘅家庭。價錢吸引，但要留意收到嗰套嘅實際做工。

#6. Dr. Brown’s 兩用奶樽清潔刷$55：吸盤方便直立收納

刷頭材質：海綿＋刷毛
配件及設計：吸盤底座、 手柄末端奶嘴清潔紋；不附獨立奶嘴刷
適用：官方列明適用於Dr. Brown’s各款奶樽。

Dr. Brown’s結合海綿同刷毛，今次起泡明顯，樽底及部分樽壁見到較細密嘅泡泡。

放入窄口樽時需要用力，抽出時未見明顯彈水。蠔油測試後，大片醬料明顯減少，樽壁仍有薄薄痕跡，樽底亦有局部較厚殘留。

吸盤底座方便直立擺放；刷頭沖洗時，海綿部分仍需按壓，幫泡泡及污垢排出。

小編點睇？
適合想一支兼有海綿同刷毛、又重視直立收納嘅家庭。手柄末端有奶嘴清潔紋；如需要獨立細奶嘴刷，就要另配。

#結論：按奶樽材質、清洗習慣及收納需要揀

今次最明顯嘅分別，係刷頭入樽嘅難易、抽出時有冇彈水，以及刷頭本身點樣洗。

蠔油測試中，Pigeon海綿、U80及Dr. Brown’s嘅大片醬料明顯減少；其餘三款較明顯見到刷散後嘅啡色薄膜。6款都有殘留，媽媽可以參考畫面差異，奶漬清潔表現則需另外評估。

泡泡多寡亦要同清潔力分開看。揀刷時，先確認適用奶樽材質，再考慮刷頭尺寸、細刷配件及自己願意花幾多時間清洗。

#建議幾耐換一次？

更換時間要跟返各品牌指引，今次查到Pigeon海綿及Dr. Brown’s有明確建議：

Pigeon海綿刷嘅約3個月，以及Dr. Brown’s嘅30日，分別來自品牌官方產品資料及奶樽刷說明書。

日常使用時，建議每次清洗順便檢查刷頭。如海綿裂開或甩碎、刷毛脫落、膠條破裂、接駁位鬆脫，或出現霉點及洗唔走嘅污垢，就應提早更換。

Snow Bear商品頁列出「保存期限5年」，呢個資料唔可以當成刷具使用壽命。

#注意奶樽刷嘅高溫消毒限制

耐熱溫度同可用消毒方法要分開睇。同一支刷嘅刷頭、手柄及配件，亦可能有唔同限制。

以上限制按Pigeon、Snow Bear、Youha官方資料，以及Dr. Brown’s奶樽刷說明書整理。

Dr. Brown’s說明書另有一款「Soft Touch」可使用煮沸及消毒器，媽媽要核對型號，唔好將其他款式嘅方法套用落今次海綿＋刷毛版。

每次用完，先徹底沖走清潔液及污垢，瀝水後放在通風位置晾乾；便攜套裝亦應待刷具乾透先收盒。需要消毒時，按手上產品包裝及說明書指定嘅方法、部件和時間處理。

本文為小編日常使用比較，結果限本次樣本、操作方式及測試奶樽。不同地區版本、型號及包裝可能有差異，配件與保養方法請以實物說明為準。

Text:MamiDaily Editorial