【移民】家人決定暑假移民中二女生想留港觸發離愁別緒

By Dara on 05 Jan 2024

Deputy Managing Editor

移民人數雖然回落，但仍有不少家庭計劃攜帶孩子遠走他方。家長認為這樣是對子女好，但站在子女角度，他們又是否想離開香港呢？本地一名中二女生，家人決定今年六、七月時移民海外，使她十分傷心，她直言英文差，又放不下學校裏的好朋友，還有一段有機會萌芽的曖昧感情，想問網民如何是好？

Photo from MamiDaily

不捨得一班好朋友

這名中二女生在IG專頁「NSS Secrets」發帖，雖然她去年已知家人計劃移民，但一直沒有確實日子，當時已覺得很傷心，哭了出來，她說：「我未試過咁傷心，我真係好唔想離開香港。」現在知道家人定於今年六、七月起行，舉家移居外地，再次勾起事主的離愁別緒。

她多次表達自己「好鍾意係香港生活」、「唔想走」，原來她讀小學時，並沒有太多朋友，只有3個同學比較熟悉。但上到中學後便大大不同，跟同學關係十分要好，讓她體會到友情的美好，憧憬着大家一起成長、一起畢業、一起迎接美好的青春歲月。「我真係好唔想離開我d frd，我真係好鍾意我啲frd」、「同啲frd一齊度過嘅青春係幾咁美好，何況我哋都仲有好多嘢未同佢哋做完」。

Photo from 《女人俱樂部》劇照

英文差擔憂難以生活

另一方面，她亦擔心自己的英語程度，她說：「英文真係好差，差到一個點，英文test成日啱啱踩線及格，vocab又少，Test嗰陣篇文成日都有成2 3 成係唔識，Writing 都係啱啱及格，講英文都唔流利，過到去都唔知點生活。」擔到時變成「文盲眼盲耳盲」，難以生活。

她又認為自己已讀中二，處境很尷尬，「呢個時候就真係好唔適合，去到嗰邊已經揀緊科，其實一係就一早小六前過去，一係就大學升學過去，中學嗰陣過去嘅話真係好唔適合。」

Photo from MamiDaily

曖昧感情萌芽中

還有一點，事主正處於懷春的年紀，跟一個對象曖昧中，覺得有機會發展。「我依家有個crush，我最近呢排同佢熟咗，而且我覺得我哋有可能，因為佢好明顯都對我有少少好感。」她希望能繼續交往，一旦移民後，彼此身處不同地方，這段青澀的感情便無法發展。她被移民問題困擾，「希望有人可以幫我解決吓呢啲煩惱」。

對於少女的問題，網民一致建議她不要胡思亂想，好好跟隨家人移民，「離開香港係一個好好嘅選擇，就算你唔想好快都要適應」、「有得走仲嫌」、「如何幫你解決，既然啊媽都決定咗，你又冇乜嘢可以改變佢嘅決定，只好接受，改善自己嘅英文」、「去到嗰度自然就會適應㗎啦」。

Photo from 《某月某日》劇照

終有一日會適應新生活

亦有網民分享自己到外地生活的經歷，明白事主的心情，指去到外國後會漸漸適應，英語亦會提升，「我英文底本身就好差，啱啱去到完全聽唔明。我好鍾意香港，完全冇諗過竟然會有離開嘅一日，走之前仲要識咗好夾嘅frd搞到超唔捨得。唔會呃你，我一開始去到係日日喊，啱啱到嗰一年好depress，上堂聽唔明跟唔切，frd唔多有時的確比人歧視。去到年尾開始接受現實，心態變咗好多」、「喺外國住耐咗個人真係會開心啲同放鬆啲，多咗好多自己嘅時間，多咗好多時間學之前唔夠時間唔敢試嘅嘢」，勸事主接受事實，當接受移民這件事後，「就會發現個世界唔同咗好多，會發現自己聽得明咗好多英文，識多咗好多朋友，漸漸地，你就成功適應到外國生活了！好難，好唔容易，我明白的，但請你記住，可怕的不是移民，而係不肯接受現實的自己。」