【貪玩小孩】返工時間小孩玩𨋢掣，媽媽竟然讚賞？大叔鬧爆回擊獲讚「好波」

By wing.wong on 27 Jul 2023

搭升降機最討厭遇著頑皮的孩子玩電梯掣，尤其是在繁忙時間，相信大家也會感到煩燥。日前，一名網民出post指，搭電梯時因遇著亂撳電梯掣的小孩，導致遲到，更過分的是，事主兩度提醒後，家長亦無出言阻止，反而讚小孩的行為。

Photo from 《殺人犯》電影截圖

好心提醒，媽媽未有理會

昨日（26日），一位網友於社交平台上指，早上搭電梯時因一男童遇到阻滯，導致遲到。她指自己在32樓落，隨後一位媽媽帶著一名幼稚園大的小孩入內，媽媽叫小孩「想落邊層就撳邊層」，但小孩卻「一次過撳咗幾層」，樓主一開始以為小孩錯手，怎料對方「越撳越多」，樓主因此出言提醒該名媽媽：「呀家長啊，麻煩叫小朋友唔好亂撳吖，呢個鐘數返工時間大家都趕落樓，唔該」，但媽媽未有理會，其他人「好似好不爽但可能驚影響到鄰舍關係而唔敢出聲，有個唔出聲直接出電梯」。

Photo from 《歡樂頌》劇照

媽媽竟讚賞小孩舉動

其後，小孩更是把行動升級，「撳晒佢住嘅單位以下所有層數」，同升降機的幾個人開始不耐煩，發出「摺摺聲」，樓主於是再提醒該名媽媽：「太太，而家係返工繁忙時間，小朋友咁樣撳法，好影響大家喎」，而該名媽媽望一望樓主，未有出聲亦沒有喝止小朋友的行為，同時，小孩對媽媽說：「媽咪睇吓我將屋企樓下個啲全部撳晒」，媽媽竟讚賞小孩：「嘩，係喎，真係好叻仔喎」。

Photo from 《82年生的金智英》劇照

大叔鬧爆獲讚好波

終於電梯內一位放狗的大叔忍不住大聲指斥：「叻乜X吖，連自己住邊層落邊層都唔X知都算，連老母都唔X知要落邊層要等個仔層層都㩒X晒逐層開嚟睇，係咪有X病呀？使唔X使幫你查吓青山幾多號電話呀？」媽媽聞言當堂呆住，「然後同個仔細細聲講小心阿叔同佢隻狗有瘋狗症，叫個仔千祈唔好學」，大叔即回擊：「你兩個就有瘋狗症，邊X個會好似你哋咁X樣，將啲呢啲電梯撳X晒，講道理唔順超就話人瘋狗症，都唔知你邊X度鄉下？」大叔一番發言，令「全電梯人都向大叔投以致敬嘅眼神」，樓主更大讚：「大叔好波」！