【夫妻關係】太太一周使晒340蚊家用被丈夫質問，網紅醫生串爆丈夫自私：要識得感恩！

By wing.wong on 05 Jun 2023

結婚後就要面對柴米油鹽問題，生活中樣樣都要錢，費用要點分擔、負擔幾多，必然係每個家庭需要考慮嘅問題。近日，馬來西亞一位太太因一個禮拜就使晒340蚊家用，被丈夫質問，有關帖文引起討論，更有網紅醫生以長文斥責丈夫自私。

Photo from 《我身後的陶斯》劇照

太太列出購物清單

近日，馬來西亞一對夫妻就家用嘅對話截圖引起討論，圖中，丈夫提出：「我上個禮拜先畀咗你200令吉（約340港幣），係咪唔夠？」、「咁快就使晒？你買咗啲咩？我見唔到你買咗啲咩。」

於是，太太列出一份購物清單，當中包括雞肉、蔬菜、米、雞蛋、油、麵粉、餅乾、茶、咖啡、糖、洗頭水、畀小朋友嘅奶粉等，太太指：「下次我會畀所有購物帳單你」，佢建議丈夫「如果唔係，我哋就一齊買嘢，咁你就可以直接畀錢」，並直言冇用過任何公用嘅錢喺自己身上：「我冇攞過你任何錢銀，所有錢都係用喺家庭上。」

Photo from Rumahtangga Bahagia Selamanya FB

帖文引起熱議，網民斥責丈夫唔識感謝太太，質疑丈夫唔知而家嘅物價，另有網民認為太太可憐：「啲錢用晒嚟打理家庭，完全冇用落個人需求。」

Photo from 《愛回家之開心速遞》劇照

網紅醫生出post串丈夫自私

有關帖文引起網紅醫生Say Shazril Shaharuddin注意，以長文出post串該名丈夫自私：「作為一個男人，我好尷尬讀到咁樣嘅訊息」，Shazril表示唔少夫婦間會建立一個WhatsApp群組上傳購物單據，Shazril認為：「如果收據係為咗畀丈夫claim錢，我可以理解，但如果係用嚟證明太太冇使錢，咁呢位丈夫對太太仲有冇信任？」

Photo from Instagram @say_shazril

提丈夫要識感恩

Shazril指，丈夫永遠唔好放棄供養太太嘅責任：「如果丈夫人工比太太低，可以通過做多啲家務作為補償。」又提醒丈夫要識感恩：「坦白講，如果唔係因為我嘅太太，我就唔會賺到我所賺嘅錢，過我而家過嘅生活，實現我所得嘅成就⋯⋯要注意嘅係，如果你知道你無法承諾婚姻、成為丈夫，就保持單身，唔好寵壞外面嘅女人。」