【生仔要考牌】爸媽催大仔生B拍心口願意湊孫 BB出世後嫌煩想出離譜方法甩難

mami熱話親子新聞

By Dara on 17 Feb 2024

Deputy Managing Editor

當自己成為父母，才明白父母的喜怒哀樂，以及無私的愛！

照顧BB不是容易事，有時家中長輩答應湊孫，時間一久，便發覺有心無力，這情況下怎算好？一名年輕港女分享家中困局，思想守舊的父母狂催兒子生孫子，並答應照顧，可是最終因顧孩子太辛苦，長輩便想出一個離譜方法甩身，令港女深感生仔和湊孫都要考牌。

Photo from MamiDaily

老父老母拍心口答應湊孫

事主在討論區《Dcard》發帖，指自己與父母及兄嫂一起居住，由於父母思想守舊，認為人的一生必須結婚，婚後必須開枝散葉，否則人生便不完整。於是自兒子成婚起，便不斷催兒子和新抱生小孩。

作為女兒的事主，感覺很無語：「（父母）完全冇諗過我阿哥佢哋成唔成熟、識唔識教人、經濟負唔負擔到，俾唔俾到BB好嘅生活，總之我阿媽拍曬心口咁講，佢會辭職留喺屋企幫手湊，而阿爸阿媽唔知點解都覺得人生咗BB就會變得成熟，覺得阿哥阿嫂會幫手湊。」事實上，這對高齡父母亦高估了自己和兒子媳婦的能力。

Photo from MamiDaily

大哥大嫂減少家用

不久後，新抱懷有身孕，由於入院分娩花了十多萬元，加上購買嬰兒用品一闊三大，本來二人答應每個月給 $8000家用，結果現時只能給$4000 。而事主媽媽遵守承諾，辭去工作全職湊孫，但照顧孩子的生活並非想像中美好，一方面嫌兒子給的家用太少，另一方面，孫兒十分難湊，令事主媽媽轉而要求女兒幫手。「阿媽嫌家用少，又冇諗過呢個BB會咁難湊。話湊到頭痛，開始想返工。然後要同我夾時間，要我幫手喺屋企湊BB，我得21歲就要為咗照顧BB冇得出去玩，有時候仲阻住我做功課。」

Photo from MamiDaily

屋企越來越多爭執

而BB的親生父母，即事主的大哥大嫂根本不喜歡照顧小孩，基本上每天只與BB玩一會兒。「阿哥每日收工返到屋企已經十點幾，抱幾分鐘就去沖涼，然後喺間房玩遊戲都唔幫手湊BB，阿嫂都係要返工，不過好小小。平時最主要都係我阿媽湊BB，同埋帶BB瞓覺，佢就越嚟越多怨言，屋企就越嚟越多爭執。」

Photo from MamiDaily

為甩身提出離譜建議

自從本港與內地恢復正常通關後，事主一家連同BB曾一起北上探親，由於內地親友眾多，大家輪流照顧嬰兒，大大減輕事主媽媽的湊孫壓力。返回香港後，事主媽媽更記掛自由自在、不用湊BB、可以返工的日子，於是向兒子提出一個離譜建議。

「（媽媽）提議直接送個BB返大陸，等大陸嘅親戚湊。而我阿哥對個BB可以話係冇乜感情，都同意，仲話要湊到讀幼稚園先出返香港。我聽完真心唔明究竟生個BB落嚟係為咩？」

她一方面指責家人完全沒有長遠計劃，另方面亦怪父母「想要BB嘅係你，話BB煩又係你，究竟呢個社會生仔幾時係要考牌？」

Photo from 《香港愛情故事》

當個BB係玩具？

網民亦紛紛指責事主的家人：「當個BB玩具咁，玩完唔鍾意就扔，送上大陸俾人玩」、「個細路咁湊法遲早出事」、「有無問下阿嫂意見？」、「最大問題係你父母，當初拍曬心口答應湊，阿哥阿嫂先生，依家唔想湊就將責任踢去大陸親友度，人哋都無義務幫你湊」。老一輩的傳統思想，以及年輕人的不負責任，有時真係會連累下一代。