熊黛林人工受孕佗孖女 計劃追多個囝囝 預產期今個月開刀「卸貨」

名模熊黛林（Lynn）去年11月突然公布懷孕，便暫停所有工作以專心養胎，一直未向外間公開BB性別，原來肚大大既佢，一佗就係孖胎，重要2個都係小公主，真係可喜可賀啦～

37歲Lynn與郭可頌結婚2年，因已達高齡，為早日郭家開枝散葉，秘密進行人工受孕，仲要一擊即中，極速完成3年抱2既造人大計！恭喜榮升準媽媽！

由於郭可頌係郭家獨子，郭家好希望Lynn可以生到個慈姑椗，Lynn自己都表示：「最好就有左個哥哥先，因為我都有個哥哥，之後哥哥可以保護妹妹。而老公中意囡囡，佢想囡囡成日可以黐住佢，而我就建議生2個，但要生囝先！」

準媽媽既Lynn整個孕期都會做瑜伽，而佢胃口亦比之前大，都會食唔少野，如台灣麻辣火鍋、雞尾包⋯⋯

到左今年3月Lynn公開左佢同老公一齊影既孕照，面依然尖尖，手腳纖細，但肚就非常之巨大，網友都一直估「係咪雙胞胎呢？」

最近，終於宣告懷有孖女，仲會係今個月內開刀「卸貨」！而Lynn的哥哥熊林係微博留言：「下個月我就當舅舅了！」

準備「卸貨」Lynn間中都會係社交網分享心情，日前就分享產婦既新聞，佢就心同感覺表示：「懷胎十月本來就是一個很幸苦的過程」，睇得出Lynn身為準媽媽緊張既心情！

Lynn：「離寶寶出生的日子越來越近了，好期待，但又有一些捨不得。過去的這幾個月時間裡，每一次的胎動都是我和寶寶身心相連的親密接觸，都有一種奇妙的感覺。老公對我的遷就和照顧也讓我更加相信，我們這個小家庭一定是幸福的美滿的。」

小編都真心祝福你地一家幸福美滿啊～

Text: Mami Editorial

Photo Source:熊黛林@微博