引發孩子潛能俾小朋友多啲空間麥雅緻：做父母有時要懂得放手

By MamiDaily on 15 Mar 2018

麥雅緻在Facebook貼出小豆玩玩具的照片，分享：「曾經喺親子討論區睇過一個媽媽發文，表示每星期都會幫小朋友安排不同節目，認為時間表填滿才算是過得充實，經常待家裡嘅小朋友會變得內向，另一方面亦經常添置新圖書及新玩具，希望帶俾小朋友多啲新鮮感，唔會感到沉悶。

孩子不一定依照物品的用途用或玩

我嘅睇法有些少唔同，一直都覺得小朋友有好多創意，俾咗一樣玩具或者圖書佢，佢唔一定會根據嗰件東西嘅實體用途去用或玩，好似相中呢個煮飯仔本身係冇咩特別，但留意番煮飯仔旁邊有個圓形盒，其實係裝圖書嘅，盒裡面有好多細嘅圖書，小豆話嗰盒係「Pizza」，因為佢話Pizza係圓形㗎嘛，佢打開咗個蓋之後將啲圖書當係一件件Pizza咁分俾我哋食，呢個都係佢發揮創意之一。所以小豆除咗會知道圖書係用嚟睇之外，佢會用來作其他嘢玩嘅，呢個就係小朋友與生俱來有嘅創意同想像力。

更多空間動更多腦筋

我哋有時候忙家務忙工作，未必可經常帶小豆出外遊玩，其實我亦有留意佢喺屋企獨處靜下來嘅時候，佢可以拎住張厠紙或糖果玩，創造出其他小玩意，我哋係冇教佢，係佢自己諗出嚟，真係天馬行空就地取材，所以家長應該俾小朋友多啲空間，有時佢哋一個人靜靜地獨處，反而會動多咗腦筋，你會發現小朋友都懂得善用周邊嘅物件，將物件賦予一個「身份」，去變成自己想像空間內嘅「角色」。