download MamiDaily 親子日常 app
【陣痛感覺】「十級陣痛」猶如畀火燒?我的51小時陣痛經歷

【陣痛感覺】「十級陣痛」猶如畀火燒?我的51小時陣痛經歷

爸媽分享
By 詩寧 on 08 Jul 2020

好多讀者係懷孕中媽媽,相信對「陣痛」有啲驚同緊張,究竟傳說中嘅「十級痛」即係幾痛?邊個位置痛?痛到幾崩潰先係BB出世?問醫生,醫生話:「呢啲嘢因人而異。」;上網Search,「痛到想死」、「痛過比火燒」當我臨生嘅時候,真係好想知究竟生仔有幾痛,希望做定心理準備呀嘛,但「因人而異」同「痛到想死」都係好抽象,我相信大部讀者都無試過「畀火燒」,所以一般都唔明「痛過比火燒」即係點?

陣痛是臨盆前的產兆之一,準媽媽可以根據這個指標,決定自己是否應該入院待產。Photo from MamiDaily

嗱,我只係生過一胎,大把媽媽經驗豐富過我。不過當時陣痛痛足51個鐘,喺入產房之前我一直努力記低個痛嘅感覺,希望生完寫返出嚟為自己同 將軍 紀錄一下。今篇希望以我依稀嘅記憶同有限嘅筆墨可以為未生/準備生或考慮緊生唔生嘅女士們提供一個參考。

我坐喺產前病房的床上發緊呆同老公WhatsApp,突然尾龍骨一下奇怪的痛(人生沒試過這樣奇怪的痛楚),好似有人用鎚仔喺我尾龍骨最後一節敲一下咁,痛楚很深的,明顯不是肌肉痛、骨頭也在痛。持續咗三秒,然後感到有點便意。

「咦?係咪開始陣痛喇?」我內心疑惑,因為因為平時撞親、扭親都係表面的痛,剛剛一下痛是整個位置內外都有感。我即刻瞓低,希望第二下痛楚來的時候再認真感受一下,等咗成個鐘,第二下痛楚沒出現,不過便意真的很濃?。起身去廁所,點知一準備大解放的時候,同一個位置又痛了,感覺跟剛才是一樣的,在體內痛得很深,雖然短短幾秒,但痛到有啲標冷汗。

「我一發力會唔會屙咗個仔出嚟呀?」我內心無知的問。即刻返出去將情況講比姑娘知,問下佢我可唔可以屙屎?姑娘問我係咪啱啱開始痛,佢話襯而家仲安全,想屙就屙咗先,再痛得密就唔可以屙喇。

釋放完體內廢物之後,我把握時間瞓,我驚唔夠瞓會無力生仔。但原來已經遲,陣痛雖然唔算密(約45分鐘一次),不過每次陣痛都會痛醒,所以當晚睡眠大約係15分鐘一節咁(因為痛醒咗唔係即刻瞓得返,瞓得返又來下一次痛)。

(其他細節喺之前兩篇生仔文已經講過,今篇集中講「痛」嘅感覺,所以我哋直接跳入產房部份。)

懷孕時,每次產檢都會變得緊張和特別敏感,擔心自己或胎兒的健康狀況Photo from MamiDaily

人手穿水之後陣痛越來越密、每一陣痛楚所維持的時間也越來越長,主要都係用一個位置痛—尾龍骨最後一節。當痛楚加強就好似地震咁,由震央一直向四方八面痛出去!即係尾龍骨突然一陣的痛,痛痛痛,向左向右痛到去兩邊盤骨、向上痛到去腰部、向前痛到去子宮、向下痛到腳軟無力,成個人好驚、不知所措,數著呼吸、標晒冷汗,內心只係希望當下陣痛可以快點完結。可惜,每一下陣痛只會比上一下更長……

✨有用貼士:由於「陣痛震央」係尾龍骨,所以當陣痛來臨時,陪產的爸爸用掌心幫忙按摩下腰是很!有!效的舒緩方法,對我來說,比起打止痛針更有效。

(上兩篇生仔文寫完之後,大家都好好奇我老公去咗邊,我唔想寫下東又寫下西所以先無安排佢出場,呢篇可以還佢一個清白,佢一直喺產房入面幫我按摩按足19小時,直到要生嘅時候比醫護趕咗出去,所以我被遺忘的時候佢幫我唔到,因為出咗去就入唔返嚟,產房不是男人可以亂進的地方啊~)

純粹個人感受,當陣痛越強,爸爸的按摩力度也要越大才有效~所以待產的父母們,媽媽練習呼吸、爸爸練習體能。

老公當時有配合按摩油使用,除咗驅走體上舒緩,亦令我個心安靜啲,因為吸完笑氣,個人迷迷糊糊唔係好知時間、身邊環境,知道家人喺自己身邊,有助大大穩定待產媽媽的情緒。❤️

至於,用咩味道、咩牌子按摩油?按摩手法係點?請向你的產科醫生查詢~

我生之前有諗過以下問題,原來真實同想像中都幾唔同:

1) 啲人話生仔痛好似急屎痛
陣痛的時候的確會急屎,不過平時急屎係腸痛、陣痛係腰背痛,位置不同。

2) 啲人話陣痛好似M痛X100倍
子宮收縮係會痛,但對我嚟講腰背痛蓋過子宮痛

3) BB出世嗰下係咪好痛?
當我知道BB個頭已經出緊嚟,我只感到無限開心(因為就快痛完),想BB順利通過產道,媽媽係需要超專注咁用力推佢出嚟,人嘅大腦好神奇,當你拼死集中一個感覺/目標,已經不知道痛了。

醫生講得啱,「痛」呢啲係好個人嘅感覺,是因人而異的,各位靚媽,你哋嘅「痛」又係點嘅呢?

Text:詩寧

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道