5種類型媽媽 你係邊一種？

每個媽媽嘅性格都好唔同，湊小朋友嘅方式亦唔一樣，以下5種媽媽類型有冇一種同你相似？無論媽媽屬於咩類型，大家都係一心為BB著想，冇話邊個好邊個唔好。

1. 緊張型媽媽

呢類媽媽對於關乎BB嘅所有事都非常緊張，例如BB幾日冇poo poo要唔要帶佢睇醫生？BB呢幾日好少笑係咪唔舒服呢？媽媽視BB比生命更重要，成日擔心BB係咪呢度唔舒服、嗰度有問題，每日都只喺憂慮中渡過，令自己精神緊張。

2. 無所謂型媽媽

媽媽湊BB本住大無畏精神，對BB嘅事比較放得好：BB今餐飲奶飲得少唔緊要、BB撞到頭冇流血冇腫冇嘔應該冇事。咁樣唔代表佢哋唔重視BB，只係相對放鬆啲，諗住「船到橋頭自然直」，總有辦法解決。

3. 耐心細心型媽媽

有媽媽對住BB可以付出超過100%耐性！即使媽媽平時耐性同細心欠奉，但對住BB可以無微不至，好似BB發脾氣扭眼瞓，媽媽都可以好有心機氹佢瞓；BB郁嚟郁去唔肯換片，媽媽點都會出盡法寶搞掂。

4. 衝動易怒型媽媽

一對住BB就咩都好心急？呢類媽媽想盡快處理BB嘅嘢，慢一步都好難接受，少少事都好容易激起媽媽嘅怒火。如果BB趕住飲奶，媽媽見到爸爸沖奶慢得滯就忍唔住話佢。

5. 宇宙最強型媽媽

「為母則強」自從做咗媽媽之後，為咗BB冇嘢再難到媽媽！以前好怕污糟，依家已經習慣幫BB換片抹pat pat；以前攞少少嘢都冇力，依家孭住BB，仲可以手抽兩大袋BB日用品。

Text: Mami Editorial