5個令媽媽又笑又喊嘅BB成長里程碑！想小朋友快啲大 又唔捨得大得太快

每個爸爸媽媽，最希望嘅當然係小朋友健康快樂咁成長。每次見到佢高一啲，學多一啲，獨立一啲，內心都有一種好特別、好特別嘅感覺，呢種感覺可能叫做矛盾，會覺得開心，值得安慰，同時又覺得十萬個唔捨得呀。

下面嘅成功片段裡面，爸爸媽媽努力咁幫BB打氣，同埋好開心咁讚佢地做得到之後，係咪腦裡面都浮現左一句「時間過得真係好快呀～」？

哈哈笑

初生BB開頭只係識得食奶、瞓覺，同埋喊。直到有一日，突然佢識笑呀！甜美嘅笑聲，簡直可以溶化爸爸媽媽嘅心。

周圍爬

無幾耐，BB就會開始探索呢個世界，學會返身、坐起身、跟住就會爬呀爬，而且將所有嘢放入口，咬。見到佢第一次好努力咁爬爬，又會好自然咁諗，幾時會行呢？

學講嘢

「媽媽」、「爸爸」、「波波」、「粥粥」，小朋友開始講嘢，好多時第一個字都係最常見嘅人、佢最鍾意嘅玩具或者食物。相信無論佢識講邊一個字先，爸爸媽媽都係咁開心，心裡面可能會問，幾時佢會識得同我傾計呢？

扶住企

扶住BB雙手，鼓勵佢地學企，企下跌下，小朋友終於成功企穩，心諗，佢唔再係BB喇，雖然仲會叫佢做BB。

自己行

成功行黎行去係第一步，跟住會將屋企裡面佢可以拎到嘅嘢，左搬右搬。呢一個時間嘅小朋友，真係好可愛，可以話係最可愛嘅階段。好想每日都陪住佢玩。

呢一個咁可愛嘅小小身影，一日一日咁長大，好快就有自己嘅朋友，自己嘅小世界。要好好珍惜佢地咁鍾意痴住爸爸媽媽嘅時候呀。