媽媽為左小朋友唔再怕嘅5樣嘢！做阿女時怕痛怕攰怕樣衰

有無發現做左媽媽，就會變成左天不怕地不怕嘅超人？媽媽係無閒情去怕，定係無得揀呢？等我地一齊睇下超人媽媽們唔怕啲咩，同有幾犀利啦！

.

唔怕痛

生仔嘅痛係高逹十級嘅痛，就算唔係自然分娩，都逃唔過傷口痛，加上日夜抱住BB，腰背痛都唔會少，餵人奶嘅媽媽仲有谷奶嘅脹痛添。經歷過咁多種痛之後，有聽過一位媽媽話，有一次唔小心整親流血，以前好怕痛，但依家都變成小事一樁。

.

唔怕攰

媽媽全天候照顧小朋友，休息嘅時間自然少左好多，特別係BB初生嘅時候，兩三小時餵奶換片一次，真係企喺度都瞓得著，除左因為自己係媽媽，再無其他原因令媽媽們抵抗到睡魔嘅引誘。

.

唔怕樣衰

女為悅己者容。以前再鍾意扮靚嘅媽媽，都可以唔化梳，求其紮條辮，就落街買野。呢個行為對於習慣左化妝先出街嘅女性黎講，其實需要好多勇氣架。

.

唔怕污穢

為左小朋友嘅健康，媽媽對住佢地嘅排泄物，會觀察、紀錄、甚至研究和討論。成功幫小朋友清理到鼻孔入面嘅污垢，媽媽就會好開心，而且充滿成功感。唔通媽媽覺得自己小朋友嘅屎屎屁屁係唔臭嘅？！

.

唔怕昆蟲

好多女士都怕昆蟲，但為左保護小朋友，咩昆蟲都好，就算係可怕嘅曱甴，為左保護自己嘅小朋友，媽媽都會變成滅蟲專家。

Text: Mami Editorial