【2個半月到港】好工人唔易搵！媽媽分享網上請外傭要求＋處理文件注意事項

By 詩寧 on 25 May 2020

前商業電台節目主持，著作《聽日準時轉工啊》。原以為生小孩子要捨棄人生，誰料孩子的出生令我更懂人生。

有得揀先係老闆－如何主動出擊搵多啲外傭姐姐喺手慢慢揀？（下）

各位父母對於請好姐姐嘅需求實在太太太大喇，本地完約外傭好揀工？驚「本地」太醒目，想請「海外」過嚟自己慢慢教？上篇應承咗大家，會詳細講下我係點樣自己上網搵到而家個好姐姐、點樣搵海外姐姐進行Direct Hire。其實坊間都有啲apps可以俾僱主同姐姐自行配對嘅，但我當時就貪方便上Facebook嘅群組搵，（群組名稱我唔公開講，不過可以俾個keyword大家自己search下－“domestic helpers”）輸入關鍵字之後就會有幾個相關嘅群組彈出，大家就自行選擇入邊個群啦。

Photo from MamiDaily

然後我就喺群組入面出個post，寫下我想搵一個點嘅姐姐，以下係我當時的部份要求，比大家參考吓：

1. 在新加坡／香港完成合約（FINISH contract in Singapore / HK）

2. 願意跟長輩合作（Willing to work with grandparents）
其實只係最初有派家人來?實，好快就得返佢單獨湊b。

3. 跟孩子同房 （Share room with baby）
（事實上嚟到係姐姐自己一間房，不過我唔想佢太早知）

4. 誠實、樂觀、懂得煮中餐 （Honest, Cheerful, know how to cook Chinese dishes）
PM傾嗰時我有叫姐姐send啲煮食作品相睇睇。

5. 可於週日以外的日子放假（Not a must on Sunday off）
講係咁講啦，點會唔放星期日～放平日邊個湊仔。

Photo from MamiDaily

總之我會盡量寫到高要求啲、嚴格啲（我覺得上述已經係高要求），然後就等啲姐姐PM申請。有部份姐姐好專業㗎，佢哋會直接send份CV過嚟，入面有佢哋嘅日常生活照片啦、識做啲咩家務啦、過往工作經驗同reference letter等等。

短短幾日我已經收到接近80封申請，然後我就簡單睇吓佢哋嘅相片同工作經驗符唔符合我家庭需要，再挑選部份適合嘅姐姐做視像interview。有冇In到眼都花？係冇嘅，因為同香港人見工唔同，問嘅嘢簡單好多，而且正常嘅姐姐其實好少，大部份姐姐你傾半分鐘已經知道係唔適合，咁就可以直接話有消息再聯絡佢，然後收線，所以都唔算花好多時間去揀。

Photo from MamiDaily

延伸閱讀：
想炒工人又唔想再中伏！自己上網直接請外傭3大好處＋風險
 【媽媽分享】以為生BB已經夠晒痛苦？其實生完仔先係地獄！

我好快就已經揀中咗而家個姐姐，繼而就係揀一間盡責嘅Agency幫我搞文件，正所謂貨比三家，我行多步，足足搵咗四間公司去做比較：

1. 價格
我要比幾多？姐姐要比幾多？

2. 所包內容
有啲包驗身、有啲包機票。我揀咗間乜都唔包，因為驗身我想另外揀間好啲嘅診所，唔想求其！

3. 處理Direct Hire嘅經驗
我自己都第一次咁請，如果連Agent都唔清唔楚就大獲啦，所以我查詢嘅時候會問多啲嘢，睇下佢哋識唔識答、清唔清晰。

Photo from MamiDaily

有啲Agency係要僱主畀晒香港同菲律賓嘅費用（約1萬），而我揀嗰間就係我同姐姐AA制，我負責香港（約4千）、佢負責菲律賓（約3千），咁揀唔係因為我想慳錢呀，而係我想多個保障，因為太多姐姐嚟香港免費Working Holiday啦，而如果姐姐係有心嚟工作嘅，照常理應該願意負責自己費用吖？咁最少我唔使驚佢反口唔上飛機啊。