傳說中的「攞我命三千」！廣華醫院順產媽媽生產記之陣痛最可怕！

By 孫師奶的媽媽日記 on 18 Apr 2020

♡ 80後新手媽媽♡ 懷孕日記 l 育兒日記 l 夫妻日記 l https://www.facebook.com/workingmamabyemi/ ?記錄小魔怪孫姑娘的成長點滴 [email protected] ?? https://www.facebook.com/workingmamabyemi/

非常感恩，懷胎十月以來一直陀得幾舒服，完全無孕吐，行得走得食得瞓得痾得，生活如常，行動自如，頭6個月體形亦無明顯變化，所以好多人都唔知我有咗BB。直至預產期前2-3個星期，個肚愈來愈重，開始坐立不安，條腰開始酸痛，瞓到半夜就會起身，第二朝又要如常起身返工，十分煎熬。

(孕照拍攝於32週，當時個肚仍然未算大，攝影師叫我挺個肚出嚟，但挺完都係唔大！)

究竟幾時生得？踏入預產期前1個星期，每朝起身都問一次呢個問題，然後每一日都有少少失望⋯ 自然分娩就有呢種令人又怕又期待，坐立不安的感覺。

預產期的早上，如常起身梳洗，「見紅」了，心諗阿女真係好準時喎！無陣痛亦無唔舒服，焗定炒米茶，拎定走佬袋，叫醒老公落街食早餐，食飽就去醫院檢查。當時以為自己好醒，準備充足，點知「空歡喜」一場⋯⋯

Photo from MamiDaily

人生自有認知以來第一次住醫院，每次醫生嚟檢查我都會問下醫生幾時生得，醫生當然話唔知道啦！既然住咗2晚都無動靜，醫生俾咗另一個日子叫我入院催生，又要等多7日，好不情願地出院。

延伸閱讀：
世上冇唔識入廚的媽媽！親力親為「懶媽媽」之嬰兒加固心得分享！

自然分娩真係令人好驚喜！明明出院嗰陣毫無動靜，點知當晚突然嚟料，終於經歷到傳說中的陣痛，由無規律的陣痛直至20分鐘一次、15分鐘一次，心諗今次應該真係生得喇！由於之前住咗2晚醫院都「空歡喜」，我唔想咁快入院，於是忍痛忍左成晚，流咗好多血，坐立不安，痛到瞓唔到，理性地執返個「走佬袋」出嚟，預備好炒米茶，忍到第二朝叫醒老公送我入院。今次痛到行去食早餐的力都無，一落街就直接搭的士去醫院。

Photo from MamiDaily

去到醫院完成一系列的檢查，原來仲要「等」！等到開始5分鐘一次陣痛，等到穿羊水先可以生，否則下午醫生檢查後再決定係咪可以落催生劑！當時我無奈到不得了，唯有沉著應戰，學阿媽話齋，食飽先有氣力生，於是乎無胃口都食返個早餐先！痛，愈來愈痛，痛到不行，坐坐下瑜珈波突然穿羊水了 (好似賴尿咁，有堆暖水湧流出來)，姑娘話準備進入產程了。