【兩胎經驗分享】BB著咗拉拉褲仲會轉返尿片？原來有2種情況需要轉返尿片！

通常BB 7-8個月開始，同佢換尿片就會難咗好多，你一邊幫佢貼尿片，佢就一邊打返開，不斷重覆好多次都著唔到。而且因為識得爬，佢哋就唔肯乖乖瞓係度俾你換。

喺哥哥7個月嘅時候，我哋同佢喺BB展換尿片，見到隔離個B係換片墊上面一轉身就走佬，跟住佢爸爸媽媽都手足無措，嗰時我同爸爸仲話好彩哥哥仲未識走，點知無幾耐就到佢，每次換片都追住佢。呢個時候發現同佢轉用拉拉褲就會方便好多，就咁一拉一穿就已經著好，不過記得同尿片一樣都要打開返兩條防漏邊。

Photo from MamiDaily

本來以為轉咗拉拉褲之後就唔會再用返尿片，但喺到咗天氣凍嗰時就覺得好唔方便。因為BB有時著兩條褲，拉拉褲雖然可以撕爛就除到，但係要幫佢著新一條，就要同佢除晒d褲先可以著到，要同佢除完d褲先著到拉拉褲，又要再著返d褲都幾麻煩，同埋都驚凍親佢隻腳仔。

Photo from MamiDaily

延伸閱讀：
【新手媽媽心靈加油站】請尊重媽媽對BB的愛＋注意說話對媽媽的傷害
【媽媽心事】為母則強？身心未能平衡 媽媽眼淚在心裡流！

我哋諗起如果用返尿片就唔使同佢又除又著返褲，慳返好多時間。咁啱哥哥同細佬係冬天嗰時已經1歲，因為已經識企，所以就冇咁易轉身走，呢個階段用返尿片會比較好。即使唔喺冬天都係比較方便。

Photo from MamiDaily

而且根據兩胎經驗，拉拉褲著咗一段時間，因為長時間箍住條腰，見到佢哋條腰都有條好深嘅橡筋痕，所以轉返用尿片BB都會舒服啲。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
Text：蜜柑兄弟成長1+1

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到：[email protected] 我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！