【抗疫】有小朋友會明白 每日不停消毒、洗手 只為減低病毒傳播機會

自從Matt豬出左世、屋企多左個BB後，個人衛生／家居清潔都會變得特別小心，例如：每次回家後都一定會沖涼換衫先抱BB、換片前都一定要確保雙手同衣物係乾淨先好接觸BB！更會叮囑家人都要咁做！

Photo from MamiDaily

最近加上疫情非常時期，令到媽媽我更加小心同緊張！ （唔係講笑的）
始終BB太細個（未到三個月）， 抵抗力一定係比大人弱，所以好難會唔擔心吧～雖然已經唔會帶BB出街避免接觸到細菌，但屋企人每日都要出門返工就無辦法，自然好驚大家會將細菌帶回家影響BB～所以唯有每日都勤力做好家居消毒，對抗疫情，減少細菌（盡力做）！

縱使家人覺得我過份擔心，甚至精神緊張！唔洗樣樣都話要消毒，但因為呢個冠狀病毒太可怕，我一於堅持，除左出門帶口罩、勤洗手之外，每人返到屋企都要將鞋踩沾濕漂白水既毛巾上先入屋再噴鞋、入屋後全身噴剎菌噴霧再立即沖涼洗頭洗衫！（老公仲話我係衛生署，每日嚴格監督大家，做少樣都會被鬧，哈哈）

Photo from MamiDaily

無論幾麻煩，為左BB、為左人人健康就要盡力做得幾得幾多，每日都要不停重複消毒真係人都癲，真心會好攰好攰⋯⋯雖然唔知係咪一定有用，但做左就一定會安心啲，至少可以減低病毒傳播既機會！

每日必做消毒List
家居：
漂白水拖地
消毒門柄
消毒廁所板、沖廁手柄
消毒BB床
開空氣清新機
注水廁所去水位

個人衛生：
勤洗手／用搓手液
飯前必定要洗手
入屋將鞋踩沾濕漂白水既毛巾上再噴鞋
入屋後全身先噴剎菌噴霧再立即沖涼洗頭洗衫

個人物件：
消毒抺電話／銀包／八達通
消毒噴背囊、手袋、鎖匙
消毒工作台、Keyboard、mouse

希望疫情快啲過，細菌快啲消失啦～ 一齊做好防疫，香港人齊齊加油呀！

謝謝收睇喔！

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text：Matt豬媽媽

Photos：Matt豬媽媽 , MamiDaily

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！