中大研究：低濃度阿托品眼藥水 可減慢兒童近視加深

小朋友愈嚟愈細個就開始接觸電子產品，令近視率逐漸年輕化，香港更加成為咗全球近視率最高嘅地區之一。中大醫學院研究發現，低濃度「阿托品眼藥水」能有效減慢學童近視加深速度高達7成，而且副作用非常少。

Photo from Shutterstock

一直以嚟，如果要控制或減慢近視加深，可以使用「阿托品眼藥水」，雖然有效，不過同時亦會出現唔少副作用，例如令人瞳孔擴張引致畏光，睇近嘢嘅時候會比較模糊；而600度以上近視嘅人更有機會出現嚴重、甚至致盲嘅眼疾，如青光眼、視網膜脫落、白內障等。

中大研究團隊為低濃度「阿托品眼藥水」進行研究，招募咗400幾位4至12歲、雙眼最少有100度近視、並且喺過去1年增加50度近視或以上嘅兒童參與研究。結果證實，低濃度「阿托品眼藥水」可以減少近視度數及眼球長度增長，而且並冇出現嚴重嘅副作用。

Photo from Shutterstock

中大表示，長時間近距離使用電子產品，會增加近視風險，雖然戴眼鏡或接受激光矯視可以改善視力問題，不過係無法逆轉眼球拉長嘅事實，同埋出現併發症嘅風險。而初生至8歲係視力發展嘅「黃金期」，家長要多加留意，盡可能防患於未然。

Photo from Shutterstock

Text：Mami Editorial