全港多個泳灘發現海毛蟲 被刺傷皮膚會紅腫潰爛！

夏天就快到，好多家長可能都會開始準備緊「下水禮」。近日，香港有多個泳灘發現海毛蟲，如果想帶小朋友去海灘玩嘅，就要留意吓啦。

香港政府拯溺員總工會早前公佈，暫時喺荃灣區同屯門區共6個泳灘，包括：釣魚灣、海美灣、麗都灣、更新灣、近水灣同黃金泳灘，發現有懷疑海毛蟲聚集跡象，而康文署亦已發出告示及廣播。

Photo from 漁農自然護理署

工會呼籲市民如果見到海毛蟲時，要保持冷靜，不必恐慌，海毛蟲其實係香港水域常見嘅海洋生物，甚少主動攻擊泳客。另外，工會呼籲市民下水時，要特別照顧小朋友。原因係以往嘅受傷的個案，通常都係小朋友因好奇而嘗試捕捉海毛蟲或者唔小心踩到佢哋先至被刺傷。

市民如果不慎被刺傷，應立即搵救生員求助。千祈唔好自己拔除尖刺，因為佢哋非常容易折斷，殘留喺傷口嘅尖刺，會令傷口更難處理。如果情況嚴重，就應盡快去醫院接受治療。

據漁農自然護理署資料顯示，海毛蟲的特徵是身體環節上的啡色條紋。牠足部的剛毛滿佈毒液，被刺傷後會有火灼般的疼痛、患處會紅腫，嚴重者皮膚會潰爛，甚至有生命危險。

Text：Mami Editorial
Source：香港政府拯溺員總工會、漁農自然護理署