新手媽媽符曉薇親身經驗 分享12樣必備嬰兒旅遊用品
唔少父母返工壓力大，放假好想出國旅遊放鬆吓，不過又唔捨得囝囝囡囡，所以都想帶埋佢哋同行。早前，陳柏宇、符曉薇（Leanne）兩公婆就帶埋囡囡Abigail返加拿大探親，順便去美國旅行。唔少父母都問佢哋，究竟帶BB去旅行有啲咩要準備？呢日新手媽媽Leanne就推介12樣必備嬰兒旅遊用品。
1. 即棄奶樽
去旅行好多時都冇得烚奶樽或者唔方便帶超巨型消毒器，咁就要準備呢款即棄奶樽啦！唔好以為係BB每次飲完奶，就要將成個奶樽掉咗佢，其實即棄部份只係BB接觸到嘅奶袋。記住去旅行之前，畀BB試用下個新奶樽，用唔慣嘅話，BB有機會唔肯用㗎。
Photo from 符曉薇 YouTube 截圖
Photo from 符曉薇 YouTube 截圖
2. 奶嘴藍光消毒機
除咗帶定多幾個奶嘴以備不時之需外，一個小型奶嘴消毒機就幫到手啦。Leanne認為買一個可以換電芯嘅消毒機較充電款好，隨時隨地都可以買得到電芯更換。
Photo from 符曉薇 YouTube 截圖
3. 消毒片
玩完返到酒店，最緊要就係將BB用品消毒殺菌！帶咗平時BB用開嘅奶樽冇得烚都唔緊要，用消毒片一樣有效。將奶樽放入一盤水，再加一塊消毒片，浸一個鐘，就可以㗎啦！
Photo from 符曉薇 YouTube 截圖
4. 奶樽清潔用具
就算就以試幾樣消毒用品，都要帶定一啲可以清潔奶樽嘅用具，例如海棉、刷等。
Photo from 符曉薇 YouTube 截圖
5. 奶樽消毒液
6. BB專用洗衣液
BB每日用到嘅紗巾數量非常驚人，加埋其他衣服、毛巾，Leanne表示差唔多每日返到酒店都要幫Abigail洗衫。
7. 衣架
Leanne指佢唔記得帶衣架真係非常大懵！佢認為酒店提供嘅衣架，衛生程度未必夠理想，一定唔及用自己嘅安心。所以佢提醒各位媽媽，如果要帶BB去旅行，一定自備衣架。
8. BB專用消毒液
BB咩都會摸下，最好係佢掂之前將啲物品消毒一下，而一啲嬰兒專用消毒液就比較溫和，唔會傷害到佢哋。
9. 泵氣嬰兒浴盤
Leanne表示，佢自己本身帶咗兩款，一軟一硬，但係佢認為硬嗰款，囡囡用得唔係太舒服，所以佢高度推薦媽媽帶一啲比較軟身嘅浴盤。如果帶吹氣款嘅話，就記得帶埋小型電動吹氣泵。
10. BB沖涼液
11. 被單、枕頭
帶定BB平時瞓慣嘅被單同枕頭，安全感倍升。
12. BB專用安睡窩
外遊時，酒店未必可以提供BB床，一個專用嘅安睡窩，BB唔止可以同父母一齊瞓覺，仲可以保障大人嘅被舖唔會蓋過BB，安全又安心。
Photo from 符曉薇 YouTube 截圖
好多人可能會認為，帶佢BB一齊去旅行，佢咁細個其實印象唔會太深刻。對Leanne嚟講，帶埋BB去旅行，唔止可以製造回憶，更可以令感情加深。
Leanne認為平時放工返屋企照顧BB，同去旅行時湊B係完全兩回事。去旅行時，係父母兩個人一手一腳湊住BB，24小時無休止，母女關係變得更親密。後來返到香港，囡囡Abigail扭眼瞓都剩係搵媽媽，令到佢覺得自己被需要，好有滿足感。
Text：Mami Editorial
Source：Leanne Kylica ＠YouTube （https://www.youtube.com/watch?v=kuUW7FylQF0）
【隨時隨地接收更多育兒教育資訊】
📱 立即下載 MamiDaily 親子日常APP
🤱🏻 追蹤我們的 Instagram: mamidaily.hk
🔔 訂閱 MamiDaily 親子日常 Youtube頻道
