媽媽問囡囡胎內記憶答案同急剖產原因吻合

By race.cheng on 05 Mar 2019

根據研究，唔少BB都會有胎內記憶。有台灣媽媽喺問2歲囡囡有關問題嘅時候，發現答案同緊急剖產嘅原因吻合，於是忍唔住同囡囡講：「你差啲玩到唔見左自己⋯⋯！」

囡囡係媽媽嘅第一胎，所以懷孕時都特別緊張，直到預產期前1個月，媽媽覺得BB嘅胎動變到好弱，一開頭以為係自己太過緊張，但家中成員就建議立即到醫院檢查，發現原來BB臍帶扭轉，養分無法傳遞畀BB，導致心跳開始變弱，需要立即剖腹，醫生指：「如果再遲1至2日先嚟，BB可能會無。」

直至囡囡2歲時，媽媽因為聽過BB會有胎內記憶，所以就多口問下囡囡，點知囡囡真係諗都無諗後答：「我喺到玩玩具呀！」媽媽就反駁囡囡話：「媽媽個肚入面點會有玩具呀？」囡囡竟然好堅定咁同媽媽講：「有㗎！有一條線，我就一直捲，一直捲啊！」媽媽就因為佢依個答案諗返起當時剖產嘅原因，仲忍唔住攬住囡囡講：「囡呀！你差啲玩到唔見左自己⋯⋯！」

胎內記憶其實係指BB喺媽媽子宮內嘅記憶，已有研究指出係屬實，BB喺媽媽肚入面係能有明確嘅意識同感情。根據日本相關機關研究指出，約有3成BB會擁有胎內記憶，而問BB有關問題時亦好睇時機。媽媽除咗要確定BB已識講嘢外（最好喺3歲前），環境都好影響BB憶述，專家建議，可以喺BB入睡前，而且係被窩放鬆狀態時問，成功率會增加。