download MamiDaily 親子日常 app
【媽媽分享】以為生BB已經夠晒痛苦?其實生完仔先係地獄!

【媽媽分享】以為生BB已經夠晒痛苦?其實生完仔先係地獄!

mami熱話 懷孕
By Circle on 18 May 2020
Digital Editor

相信所有媽媽對生BB的經歷一定十分難忘,不論是順利或遇到困難,都要咬緊牙關挺過去!近日,作家「詩寧」在社交平台分享她在公立醫院的產後慘痛經歷,例如誕下寶寶後被遺忘在產房2小時、護士/醫院工作人員的惡劣態度等,竟獲得大量媽媽共鳴!各位男士/子女們,看畢這篇「媽媽血淚史」後,一定要更加愛錫老婆和媽媽,因為生仔真的是「搵命博」!

各位男士/子女們,看畢這篇「媽媽血淚史」後,一定要更加愛錫老婆和媽媽!Photo from MamiDaily

上篇講到,生完將軍(詩寧兒子乳名)之後,個醫生聯針錯完一次又一次,聯到第三次佢終於完成,我雙腳舉高咗幾個鐘亦終於可以放返落嚟。當時發緊高燒嘅我用盡全身力氣問醫生:「可唔可以比杯水我呀?唔該。」

佢話好,轉頭叫姑娘拎比我。結果,我一等,就等咗兩個鐘。唔好忘記,嗰兩個鐘我身上只穿著紫袍、沒有衣服的、人在發燒,漫長的兩個鐘,產房好凍、生完仔流失咗好多好多血,我覺得自己已經凍到似一條死屍,真心的,我當時覺得自己會慢慢的死去⋯⋯

點解唔叫救命?陣痛51小時再加生完仔,我真係零力氣了⋯⋯生過BB的媽媽會懂。

公立醫院產後地獄100小時Photo from MamiDaily

差唔多天光,掃地阿姐入嚟掃地,驚見我就死咁瞓喺度打冷震,問我:「你喺度做咩呀?」
我心諗,你覺得呢?我答:「冇人⋯⋯水⋯⋯」

好彩佢醒,咁都明我講咩,佢大驚:「下!佢哋唔記得咗你呀?我幫你叫人嚟。」

跟住好快就有個護士好驚咁衝入嚟推我出去,仲比咗個電話我打畀老公報平安,老公好擔心問我有冇事,佢話佢有問護士點解咁耐都未出返去,護士答佢我聯緊針,一直都聯緊針⋯⋯(聯咗4個鐘?!)

因為我發燒,所以將軍一出世都被我傳染了,佢都發燒,我冇望到佢一眼,佢就比人推咗去BB病房,之前幻想一生完要一家三口合照、BB會瞓喺我心口⋯⋯ 全部都冇,我連自己個仔咩樣都唔知。

又等咗一個鐘,產後病房終於有位收留我,由於將軍唔係跟喺我身邊,所以我被安排於全房最窄嗰個床位,窄到點?窄到有人嚟探我係唔能夠企我隔離,只可以企床尾;窄到連放食物嗰張檯都推唔到埋嚟,我食嘢要捧住食,醫生埋嚟寫報告都要成份托住寫,有醫生因為冇位放低份嘢而發脾氣。

入到產後病房,個阿姐幫我過床之後就走咗,我繼續好凍同發燒,啲血係咁流出嚟,我隻手打咗豆但條喉又唔夠長,我伸唔到手去按鐘叫人比水我,只能夠好細聲咁叫救命、救命⋯⋯ 對面床個媽媽見我好慘就埋嚟問我咩事。

點解唔叫救命?陣痛51小時再加生完仔,我真係零力氣了Photo from MamiDaily

我:「我啱啱生完,而家應該點?」
佢:「下,你衫都未著喎,你著返M巾換返衫先啦。」之後佢就返咗自己床湊BB。

詳情我唔寫喇,總之我一邊喊一邊好困難咁幫自己著返啲衫褲,足足著咗一個鐘頭(都話打豆條喉唔夠長,我有一隻手郁唔到)!真正天光喇~護士們好忙咁喺度派藥、「鬧」其他阿媽唔餵人奶、踢啲人出院之類。

而噚晚推我入產後房個阿姐埋嚟見到我,佢大叫:「哎呀!對唔住呀10號床媽媽!!我琴晚太忙唔記得幫你著返衫,哎呀!你自己著M巾呀?你點著到呀?你咁犀利嘅生完都有力自己著。」呢個時候,我先知原來生完BB係有人會幫我著M巾同著衫嘅?!

我內心滿是粗口但個口講咗更重要嘅嘢:「我想飲水呀唔該。」(仲記得嗎?我聯完針已經話想飲水,但你睇咗成千字我都未飲到啖水呀)

姐:「哎呀!對唔住呀10號床媽媽!我而家即刻比水你飲,你要全部飲哂呀!因為你一陣要屙尿,屙唔到要插尿喉架!」佢畀咗壺水我,連飲幾杯之後舒服咗啲。先啱啱擺低個杯心諗終於可以瞓啦?我大約60個鐘冇瞓過喇。

又等咗一個鐘,產後病房終於有位收留我Photo from MamiDaily

點知就有個勁惡肥護士埋嚟睇睇我排板,然後又大叫:「喂你仲未屙尿?噚晚到而家喎!唔得呀,你要插尿喉!」

我即刻喊出嚟:「唔係呀,我冇飲過水呀。」

佢望一望見到有壺水喺度:「你講大話,呢度咪有水囉,做乜唔飲呀!點會唔飲呀!唔得呀,你屙唔到尿冇得出院架,要插尿喉!」

呢個時候我諗起監獄風雲個魯芬喺度屈其他囚犯咁。

我:「壺水岩岩先拎嚟架,你啲同事噚晚唔記得比我呀,你比多少少時間我啦,我屙到架。」(不斷喊)

佢好不爽咁話比多半個鐘我。

我真係好驚,個傷口本身就好痛,仲插喉?我同自己講,我一定要屙到、點都要屙到,但原來生完BB要屙篤尿都唔係咁簡單,由於我唔夠力坐起身,只能夠瞓喺度屙,係囉,瞓喺度點屙呢?所以半個鐘後都係屙唔到,我驚到自己倒咗啲水落個兜,希望呃到「魯芬」。

魯芬:「點呀,屙到未?」

我:「屙咗少少。」(勁心虛)

魯芬:「你呢啲邊係尿呀?!!惡露嚟咋嘛!」

最後,我輸咗。

然後到探病時間,60幾個鐘冇瞓呀,我繼續死屍咁攤喺度郁唔到,家人幫我抹身、換衫,見到我成床血就叫姐姐幫我換床單,結果又比人鬧:「嘩你搞乜搞到成床都係血呀,咁污槽你琴晚唔出聲?」成床血就係因為你同事琴晚遺忘咗我囉⋯⋯

到夜晚我以為捱過70、80個鐘終於可以瞓喇呱?點知瞓瞓下,隔離床突然好熱鬧!有四個女人好開心咁傾傾傾,我比佢哋啲笑聲嘈醒咗,原來隔離床係該醫院嘅護士,探佢嗰啲係同醫院嘅同事,所以有特權可以半夜三點探病!佢哋傾得好興奮,我醒咗之後見到其他床都陸續開燈,然後啲BB又喊,一個喊、全部喊! Oops,我好似未話你知,我間病房係30人大房呀!29個BB一齊喊,你想像到個聲浪嗎?

因為太辛苦,我又喊咗一晚⋯⋯

終於等到第2日,早餐係麥皮,大約80、90個鐘冇瞓過我好暈坐唔到起身,我哀求送早餐嗰個阿姐幫我較直張床(人手轉轉轉嗰種),「唔該可唔可以幫我較直張床呀?我坐唔到起身食嘢呀,唔該你。」如果可以跪,我可能跪咗喺度求佢,我真係好肚餓好需要嗰碗麥皮!!!點知佢眼尾不屑地望望我就走咗,佢連Say No都沒有,直接轉身走咗。

點算呀?唯有瞓喺度飲落肚囉,真係好肚餓呀!二戰嗰時,我阿爺食樹皮都係咁啦!瞓喺度食麥皮有咩咁奇呀?!

我真係好肚餓好需要嗰碗麥皮!Photo from MamiDaily

點知飲完唔夠半分鐘,我立即就反胃嘔返出嚟,第一下嘔咗落地,之後已經好快手用膠袋接住,嘔完之後,我按鐘叫姐姐嚟幫手,佢一行嚟就鬧:「嘩!乜嘔到周圍都係呀!」(我發誓並冇周圍都係,只係得少少喺地)

我冇出聲,交咗袋嘢比佢,佢繼續鬧鬧鬧⋯⋯ 我終於忍唔住:「我想嘔架?你估嘔唔辛苦呀?係你唔肯幫我較直張床,我被迫瞓低食先搞到嘔㗎!」之後佢就收咗聲。我當時覺得自己好蠢,原來要還拖,點解我之前係咁唔該前、唔該後呢?原來惡先有用。

到夜晚出院,嘩!終於可以離開地獄喇!!!點知魯芬又出嚟,話我因為一直都係插住尿喉,出院前要確保我屙到尿先放我,咩話?如果屙唔到就要住多晚?我即刻勁驚,我要走,我一定要走!

雖然我好暈同傷口超痛,唔係幾行到路,我媽拖住我,慢慢行入廁所,等咗好耐⋯⋯屙唔出,一來係因為傷口痛,我唔敢用力,二來係⋯⋯ 條喉插咗一日一夜,有咩都放晒啦,仲邊有得屙……但我真係唔可以再留喺地獄多一日,唯有求阿媽幫我出貓,佢初初唔肯,因為佢都驚我屙唔到係身體有事,夾硬出院好危險,但我覺得再唔出院會更危險,分分鐘死咗喺床都冇人知。喊喊喊,最後喊到佢心軟了。

返到屋企,嘩我個身臭到不得了,立即沖涼洗頭然後極速瞓著。

就係咁,我產前產後一共喺公立地獄過咗5日,百幾個鐘冇瞓過,而將軍BB呢?仲要住多幾日先出院,而當我探佢嘅時候,發現佢並不比我好過啊⋯⋯

我產前產後一共喺公立地獄過咗5日,百幾個鐘冇瞓過Photo from MamiDaily

此文一出,便吸引了不少媽媽分享經歷!同時亦有計劃未來會生育的網民指,無論如何都會讓老婆到私家醫院生產!不知道看完詩寧的產後分享,有勾起你們的回憶嗎?跟我們一起分享吧!

此文一出,便吸引了不少媽媽分享經歷!Photo from Facebook截圖

有網民指,無論如何都會讓老婆到私家醫院生產!Photo from Facebook截圖

*內文圖片僅為示意圖,非涉事人/醫院。

*本文由【詩寧】授權轉載,按此查看原始文章/其他相關文章。

Edit:Mami Editorial

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道