download MamiDaily 親子日常 app
【卸貨記錄】伊利沙伯醫院 三小時快速生產記!

【卸貨記錄】伊利沙伯醫院 三小時快速生產記!

爸媽分享

合桃酥出世4個多月後終於有時間打番當天生產的經歷,很害怕1年、5年、10年後會慢慢淡忘,因此當然要記錄一下啦!還記得原本打算前1後9放我的產假,點知29號最後一日上班,30號合桃酥就趕住出世,最後造就了我前0後10產假。好~講番當天仍然歷歷在目的畫面!

30號的早上,那天是39wk1d,我跟爸爸及家姐忙著處理家中的緊要事,大約在中午12點左右,開始先有著很急很急的感覺(由於已經有幾天沒有大便了哈)所以也以為是大便啦吧。點知坐了很久也沒有便便,那就放棄吧。之後肚就開始3-4分鐘痛一次,每次大約痛20秒左右 但果種痛是接受到的對於我來說,由於家中要緊要事處理,所以我也沒有跟家人說,堅持裝著沒事(現在想起都覺自己很厲害!)

直至到回到娘家,肚就開始愈來愈痛了,大約中午4點左右,見紅啊!終於就叫我家姐陪我去QE,同時我打比老公叫佢拎走佬袋係醫院等,而我亦沖埋涼先去醫院!

由於一直QE覆診,所以呢個時候直接去B座4樓登記先,家姐在外面等。我就自己入去做了基本既檢查,但短短檢查了一陣,我已經痛了3-4次,姑娘話仍未開度數,再問埋我d基本問題就叫我去C座2樓產前病房。

一到了C座2樓產前病房,姑娘叫我換衫,家姐就幫我辦理入院登記手續,之後駁上了胎心機,是用來監察住bb既心跳和我陣痛既指數。我一陣痛,指數就不停向上升,一不陣痛,指數就會下降。大約晚上6點左右,老公都來咗!呢個時候就真正感覺到好痛好痛,痛到出晒汗,好期待唔陣痛嗰一刻,好彩當時是探病時間,所以老公同家姐都可以留係病房照顧我,否則我自己要一個孤軍作戰!

到醫院派飯時間,我已經食都食唔到,派飯姐姐叫我食多啲先有力生,但我一食就痛,家姐、老公一個餵我食飯,一個幫我抹汗!派飯姐姐教我一痛就吸氣之後好似吹蠟燭呼氣咁,我好努力跟佢指示,但真係好痛,心諗點做呀?老公就係咁同姑娘講我好痛,但姑娘叫我有好急屎感覺先再叫佢啦。

大約晚上7點零,我就真係感覺到好急屎好急屎!7點半左右,咇一聲,啊!穿羊水啊!我仲以為自己屙咗臭臭,幾個姑娘即刻嚟到,就話我開左4度,叫我過床去產房!但要自己落床去隔離張床推我過去。媽的啊!痛到點自己過床,但忍住,一鼓作氣跳過去!之後姑娘推我去搭電梯去產房,呢個時候已經開左7-8度,姑娘都話咁快啊!

大約晚上7點40-45分我已經到產房,去產房途中,我已經好想好想屙,但姑娘係咁叫我唔好用力,因為未開哂十度,「夾硬」生對bb都好危險,叫我忍忍忍,同叫我吸氣吹蠟燭呼氣。

入到產房就比左個笑氣我,之前聽人講笑氣冇用,但對於我來說很有用!我要拎住佢先捱到,我心諗點解老公仲未入黎呢?之後聽番老公講,原來姑娘話要set好儀器,叫佢15分鐘後就再敲門啦!

入到去一陣,都未夠15分鐘,我已經開晒10度!之後平時幫我產檢既助產士入左黎幫我接生 我本來好亂好亂,但聽到佢把聲,我即刻冷靜咗,仲聽了佢指示,姑娘叫我用力生,同時叫我老公入咗嚟,用咗力2下,晚上7點58分,bb出世了!

姑娘之後幫我縫埋針,再放bb伏在我心口,今次生產終於完結了!

沖完涼涼,靚仔晒!

總結:5點入院,8點就出了世,好感恩!感恩合桃酥好錫我,可能我陀bb咁耐,日日都行好多路,直到生嗰一日,我都繼續行好多路!

==============================
Text & Photos:90後媽媽~Wawa酥媽

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到:[email protected] 我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道