【生產過程】地獄黑仔痛足33小時之完啦好嗎！（三）

正當我同我媽諗緊我會點死之際，竟然有個馬來西亞華裔醫生出現，話佢未做夠hours，而家補鐘鐘數，簡直係菩薩嘅化身。不過好死唔死我臨生之前貪心又噤多劑麻醉藥，所以搞到我push嗰時唔識用力。助產士同醫生一路叫我當疴屎咁用力，仲要一路谷住道氣，但我已經痛足成日加無食過野，所以每咇少少就洩氣然後bb就縮翻入去。

生到咁上下醫生問我要剪一刀喇你肯唔肯，我心諗我打完麻醉都唔會feel到啦。我話ok之後就聽到平時剪牛雜嗰種交剪剪左清脆嘅一聲，加feel到好似平時切五花腩割開嗰種感覺(哭)。

經過唔記得幾耐之後，終於喺半夜feel到有d野sir左出來(笑)，助產士抹好bb後就將佢放喺我心口(澳洲提倡skin to skin，可將媽媽身上嘅好細菌叢過俾bb)。我仲以為我會好emotional忍唔住喊，但我第一個感覺係我想休息同bb好醜怪(笑)。

↓助產士幫BB笠左頂冷帽仔 可愛

之後醫生就幫我逢針，打無痛嘅好處係真係無痛，仲可以同醫生有講有笑，最搞笑係醫生話入錯行其實想做藥劑師(我心諗千奇唔好)。

搞掂晒之後，我就同bb被送上普通病房，視乎bb同我情況觀察一兩日。普通病房係一個廁所兩個人share的，好彩我隔離床無人。
之後成晚就訓下醒下中渡過左，因為助產士隔一陣又入泥叫我餵奶又盛，但bb又唔係點食可能係因為我成身臭汗(笑)。係咁搓圓㩒扁先得嗰幾滴仔黃金初乳，裝埋落針筒浪費埋幾滴之後真係所餘無幾。加上一路作嘔又頭痛，不過好彩仲後生頂得順。

↓貴過黃金呀大佬

↓靚景

點知第二朝助產士俾左個尿兜我，話如果我唔疴夠咁多mL就同我插尿喉(哭)，大佬呀而家我下面體無完膚，仲要麻醉開始散，我抖氣大力d都唔敢。

但因為我唔想我下面再受罪，惟有頂硬上。仲要阿媽話坐月唔掂得生水凍水，我就一路行出行入pantry同病房狂拎熱水灌，未試過咁慘。點知助產士又話我疴唔夠，又話俾多幾個鐘我如果唔係就插硬，如是者又係好頻能咁飲左幾個鐘滾水，終於唔使俾人煩(有諗過加水入個尿兜(笑))。

惟一一個值得讚嘅地方係，留院嘅2日1夜佢地每日都有d課堂俾新手爸媽上，對於一d經驗都無嘅我地係幾有幫助。

D伙食就⋯⋯不提也罷

↓有得揀算係咁

↓賣相同味道一樣咁”好”(笑)

不過到出院嗰日，佢地都係無幫bb沖涼，所以bb個頭就係咁，夾雜住d血加d汁，一齊翻屋企。

↓頭上仲係我D血同血塊 慘(笑)

以為生仔已經夠慘？問過餵人奶未？沒有最慘，只有更慘。

Text & Photos: 新手媽咪手記by吾係阿化