【2019生產記】第一胎38週法國醫院開刀｜入院程序＋剖腹過程＋收費

Hello 各位媽媽們，不經不覺產後已經兩個半月了，終於有時間來紀錄一下我的開刀生B過程喇！Matt豬仔係法國醫院出世的（出世週數38W2D）～

入院程序：
由於我係早上7:30開刀，所以需要提早一晚入院。當晚8:30入院直接去3樓登記同簽入院文件，之後老公去地下入院部交住院按金$7000，另外姑娘會講解有關須知（包括：每日探訪／睇BB時間、辦理出世紙資料、揀奶粉、12點後不准飲食等等⋯）
＊特別一提係老公陪產費需要加$1000
＊老公抱BB只可以等親子時間（每晚8:30-8:55）$60 一次15分鐘

之後就要驗小便同磅重，姑娘會幫忙剃毛毛，搞掂哂就會有姐姐帶上房。
上到房，床上已有一袋醫院送的產後用品（衛生巾、床墊、網褲、沖洗瓶、牙膏牙刷、杯、梳）。住院期間都夠用，所以自己可以唔洗帶咁多～

我揀住6人房（因3人房我有啲驚，哈哈），當晚連埋我得3個人住感覺都好靜，之後幾晚都係3-4人，房裡有一個廁所連沖涼企缸。每張床上都有獨立電腦可以睇電視、上網、叫餐，好方便呀！

剖腹過程：
第二朝，開刀前半個鐘要換好手術衫等姐姐推床上黎過床，落去前姑娘比左支胃藥水我飲，等落麻醉藥時可以保護返個胃。之後就落到分流站等待入手術室喇，個一刻心情都未算好緊張，但又好想快啲完成。到推入手術室喇⋯先係手插針，再聽到準備要打背脊麻醉針開始驚喇，因為一直都聽人講打背脊麻醉支針係好粗同好痛架！（但竟然無想像中咁痛）打完麻醉之後下半身會慢慢麻痺同好快就無感覺（硬左咁），嗰時醫生護士就開始準備，首先會用一塊大布遮蓋晒肚以下嘅身體，所以整過手術過程係睇唔到的，只會聽到聲音。
雖然係下半身麻醉，但麻醉藥影響到我都有小小暈（或可能會有想嘔，視乎個人），一切準備好手術好快就開始，呢個時候先會比老公入黎陪產，佢一入到黎已經面青青⋯緊張到要我同佢傾計安慰返佢轉頭，哈哈（激死中，但又好好笑）

開始左大概15分鐘左右，醫生同護士就開始前後用力禁我個肚要將BB推上黎，當時佢地應該都好大力下，但我只感覺到張床係搖而又唔會覺得痛的。反而係諗點解推左咁多下BB都未出黎既，幾分鐘之後終於聽到醫生講：「BB成功出世喇！」

影完相之後，老公就要出返去等喇，而我就繼續等醫生幫我處理完傷口先可以上房。整個手術大概一個鐘左右就完成（開刀真係好快）！

上到房兒科醫生好快就會黎講返BB出世體重同一切身體狀況，之後我就繼續休息等麻醉藥慢慢過，當時都擔心傷口會唔會好痛，好彩姑娘會定時比止痛藥，加上第一日係唔可以落床，所以麻醉藥過後都唔算太痛。但就要慢慢轉身～

到中午家人就黎睇BB（BB出世後要保溫觀察4-6個鐘先可以睇得），而我就只可以睇相係床上繼續休息（24小時唔落得床），到夜晚9點左右姑娘會抱BB黎比我見同影相，第一次抱住Matt豬呀！

到第二日中午落到床後先可以去餵奶同睇BB！

總括嚟講：
開刀過程比想像中無咁驚，背脊麻醉針比想像中無咁痛，唔係咁恐怖，而且手術好快就完成，感覺好似發左場夢BB就出左世。只係頭一日落床傷口好痛好辛苦要慢慢適應，但一日會比一日好，到出院時就已經好好多了！

希望我既經歷可以減輕各位準媽媽既擔心同緊張啦！
祝各位準媽媽生產一切平安順利！

謝謝收睇喔～

以上純粹本人分享，大家可以自行評估適合／不適合喔～～

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

Text & Photos：Matt豬媽媽

【誠徵Bloggers！】想分享你的懷孕及育兒日常？請將投稿連同約40字個人簡介和近照一張，電郵到： [email protected]，我們會幫你開設個人專欄，文章經編輯部潤飾後更有機會刊登在FB專頁，快點踴躍投稿吧！