download MamiDaily 親子日常 app
【行為治療】想改善小朋友的行為問題?不如從親子關係入手

【行為治療】想改善小朋友的行為問題?不如從親子關係入手

爸媽分享 家庭關係 教育心得
By 比卡超人妻 on 31 Dec 2019

我女兩歲半,依家真真正正每日都考驗緊我嘅忍耐程度。 自己喺facebook follow咗好多關於教養嘅專頁、睇咗好多唔同育兒天書,大部分心理學家所寫嘅: 原來好多學者都認為其實小朋友兩歲至四歲大腦嘅Frontal lobe都仲未發展成熟,所以就算家長們好激氣、不停指責小朋友,佢亦都唔聽話。家長會覺得無從入手其實係正常嘅,因為呢個歲數嘅小朋友係無自我控制嘅能力。

行為治療 - 家長覺得無從入手Photo from MamiDaily

大腦關於判斷、評估風險嗰一部分其實係差唔多到成年人、二十多歲才發展完成,所以可想而知點解2至4歲嘅小朋友,甚至小學生嘅自我控制能力都係未發展成熟嘅。我哋父母同學校嘅期望,對比起小朋友嘅需要係有非常大嘅落差。

有好多喺我哋眼中視為「頑皮」嘅行為 ,可能喺小朋友嘅角度嚟講,佢哋唔明白點解學校同家長們會大發雷霆同破口大罵,加上佢哋嘅角度而言只會覺得「今次又畀父母鬧啦⋯⋯」、「點解自己咁冇用?」、「點解爸爸媽媽對我冇咗以前嗰種愛護?」久而久之⋯⋯對佢哋嘅心理傷害係非常之大。

我自己只係一個全職媽媽,唔係啲乜嘢專家或者教育界人士,只可以勸勉大家,小朋友好多時嘅行為問題,其實都只係想引起父母嘅注意,希望父母能夠抽時間心機坐喺佢隔離陪伴。對小朋友嚟講:愛等於時間,愛等於陪伴。

愛 — 並唔係時時都要挑剔;愛 — 並唔係事事都要做到最好,例如唔小心整爛嘢,與其破口大罵,倒不如大人做成熟嗰個去控制自己嘅情緒。

行為治療 - 家長覺得無從入手Photo from MamiDaily

另外好多育兒嘅書籍中,專家解釋有時小朋友尖叫,可能只係一種情緒嘅表達,並唔係特登想激我哋、令我哋失望。小朋友好多時佢哋想做就做,開心興奮就會大叫大跳。我哋做父母唔應該每一次都去克制佢哋。

你哋可能會覺得喺香港好難可以畀佢哋隨意咁樣玩、隨意咁樣大叫大跳、去放曬啲電。但其實每日抽半個鐘或者一個鐘全心全意地陪小朋友投入於遊戲中,又或者全心全意地拎起故事書同小朋友一齊閱讀,你會察覺小朋友嘅行為問題會慢慢、慢慢咁樣改善。效果未必會係一朝一夕好明顯,但以我自己嘅經驗可以同大家講抽時間陪伴 ,令小朋友感受到愛,自然頑皮會少左, 因為唔使特登去做一啲嘢引起父母注意、去搏取父母嘅關愛。

現今大部分人都機不離手,對於好細個嘅小朋友嚟講,佢哋會唔明白點解父母寧願睇手機都唔同自己一齊玩,又或者可能我哋表現得唔係好熱衷、唔係好投入、對佢哋好敷衍、好少誇奬、少比正面嘅回應。

行為治療 - 家長覺得無從入手Photo from MamiDaily

 

做咗父母嘅我哋,不妨重拾一下童真。若果小朋友想我哋跳舞,我哋不妨一齊跳;想我哋轉圈,我哋不妨一齊轉;唔好下下都對佢哋潑冷水, 玩樂當中係小朋友最感受到愛嘅時候。小朋友其實好渴望見到我哋鬼馬、玩到癲、無憂無慮嘅一面。想小朋友快快樂樂,大人自己首先要快樂、樂觀,學習調整自己嘅情緒。

做咗全職媽媽,發現個女教識我:做人唔使咁拘謹,有時發下癲做傻大姐,反而會令個人輕鬆一點,忘記煩惱。

==============================

Text:比卡超人妻

Photos:MamiDaily

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道