download MamiDaily 親子日常 app
【新手媽媽 產檢注意事項】

【新手媽媽 產檢注意事項】

懷孕 爸媽分享 產前產後
By Stefani on 17 Sep 2019

奇怪啦!點解珍珠4個月大先出產檢post?並不是珍珠麻咪又有喜,只係回想返當日第一次喺公立醫院做產檢其實好徬徨,公立醫院要處理嘅cases太多,有時未必可以講得好清楚/ 會重複講,加上珍珠麻咪有點佛系⋯⋯好多檢查都係好遲好趕先book,所以麻咪一於寫返少少事項,希望俾新手媽媽盡早有個心理準備~

首先第一問,一定係問「是否必須到公立醫院檢查?」

其實唔係必須,珍珠麻咪選擇喺私家醫院順產,但考慮到如果喺街突然有咩狀況要入院,救護車只可以送孕婦到就近公立醫院,所以不論媽媽選用公立定私立醫院生產,都係喺公立醫院留個record穩陣。

「發現懷孕後,第一步係做啲咩?」

當然係去就近診所驗清楚真偽先,珍珠麻咪就去左自己用開嘅婦產科醫生度做第一次檢查,先拎懷孕證明,後去公立醫院婦產科掛號。

正常情況大約係懷孕6-8w,因為珍珠麻咪比較遲先發現懷孕,所以好多checking schedule都好似趕deadline咁。

呢張懷孕證明之後好多地方都要用到,影低softcopy確保唔好唔見。

MamiDailyPhoto from MamiDaily

初次產檢小注意:

驗孕通常需要用尿液+試紙去檢驗,媽媽請留意用中段的尿液,咁樣係最準確。

產檢盡量穿著舒適,方便著除嘅衣服。因為要check血壓,所以預好充足時間到診所,無謂趕住跑去,辛苦孕婦同時亦不易量度到正常血壓。

記住懷孕前最後一次月經日期,呢個日子喺頭幾次產檢/照結構,不同嘅醫生會不斷問你去確保所有日子無誤。

*盡量記住孕婦所有個人及家族病歷

公立醫院掛號須知:

醫管局有個app叫「預約通」,先做網上預約特定日期時間去掛號(大約係懷孕8-10w),文件上嘅野要帶齊,app會提你要帶啲咩。

身份證明文件一定要帶,老公嘅身份證都需要帶定副本,仲有住址證明,要confirm你去返正確居住地區所屬醫院。

除左文件以外,要再三提醒媽媽帶備3樣野:

暖水,乾糧,外套!

暖水,乾糧,外套!

暖水,乾糧,外套!

因為經驗黎睇,不論講幾多次,都會有媽媽唔記得帶,等待見醫生/檢查嘅過程,一係餓到暈,一係凍到震,所以每次產檢都記得要帶!

踏入12w,(14w前)公立醫院會免費提供「唐氏綜合症檢查」(度頸皮)會由醫生用超聲波去睇。

另外媽媽呢段時間可自選到私家診所抽血去做「無創性胎兒DNA產前篩檢」(例如T21及Nifty)

珍珠麻咪又係deadline 22w前先去book⋯⋯嚇到姑娘即刻搵翌日嘅位俾麻咪攝,真係辛苦哂

MamiDailyPhoto from MamiDaily

去到20w,就可以到私家診所照結構,醫生會用超聲波去詳細睇下BB器官四肢是否齊整。照結構要盡早book定醫生,大致係一發現懷孕就要揀定醫生準備book,一啲熱門醫生係極速無位,珍珠麻咪就係好遲好遲(deadline 24w尾)先揀醫生book,最後打左好多電話先book到位出名熟手而自己又有信心嘅醫生。

成個過程真係趕到心血少啲都唔掂⋯⋯所以媽媽們要預早準備!

照結構當日要瞓得足,食得飽,確保有足夠胎水,俾bb移動,方便醫生睇清楚

帶備糖果,如果真係一次照唔清楚,就食粒糖,喺候診室行行企企,等BB郁下再照

MamiDailyPhoto from MamiDaily

到24w,黎到「飲糖水」高峰期,聞風喪膽嘅飲糖水其實係用黎check妊娠糖尿,公立醫院係抽樣檢查,高危組別會需要做,例如有家族病史或高齡產婦等等。

私家醫生都會建議孕婦自費檢查,有個安心,因為妊娠糖尿可以係無先兆,就算食得再清,再健康,都有機會突然發病。

聽其他媽媽分享,糖水份量係一隻熱飲外賣杯咁上下,需要空肚一次過吞哂落肚先可以抽血驗,如果嘔左就要再約日子重新飲,Amen。

28w打後都係一啲常規檢查,度高磅重、聽bb心跳、check胎水、度BB size,望下超聲波入面嘅BB,孕媽媽已經差不多熟哂流程,期間可以自選健康院或/及私家診所做檢查。

私家診所先有提供每次超聲波檢查,健康院只有一般度高磅重,用胎心機,姑娘摸下胎位etc.

珍珠麻咪一直到私家診所做檢查,就算隔住個mon,都想望下粒珍珠同聽下佢心跳,每次都眼濕濕架⋯⋯

MamiDailyPhoto from MamiDaily

去健康院時順便申請埋「醫健通」,方便私家醫生都可以睇到孕婦喺公立醫院嘅報告結果

B鏈球菌化驗測試,大約36w健康院免費提供。

順產媽媽特別需要做,預早知道結果,醫生提供相應療程就可以避免順產時傳染俾BB,避免令BB一出世就要接受額外醫療程序。

有任何唔清楚,麻煩都要問多姑娘幾次,問到清楚為止。

所有程序/週數只供參考

媽媽加油!BB會喺你肚仔度一直陪住你~

==============================

TextStefani

PhotosStefani , MamiDaily

【誠徵Bloggers!】想分享你的懷孕及育兒日常?請將投稿連同約40字個人簡介和近照一張,電郵到: [email protected],我們會幫你開設個人專欄,文章經編輯部潤飾後更有機會刊登在FB專頁,快點踴躍投稿吧!

【隨時隨地接收更多育兒教育資訊】

📱 立即下載 MamiDaily 親子日常APP

🤱🏻 追蹤我們的 Instagram: mamidaily.hk

🔔 訂閱 MamiDaily 親子日常 Youtube頻道