好消息！患罕見病小智愷心臟移植手術成功

就算仔女傷風感冒，爸爸媽媽都已經好心痛，更何況小朋友不幸患試罕見疾病？依家約20個月大嘅小智愷自出世起一直受病魔折磨，身患限制性心肌病嘅佢情況突轉嚴重，需要留院等機會換心續命。

Photo from 資料圖片

小智愷同佢哥哥先後患上限制性心肌病，呢個病非常罕見，有指未必年年會有新嘅患者。患者嘅心臟無法發揮功能，更會令多個器官衰竭，而此病更無法用藥醫治，只能靠換心續命。小智愷嘅哥哥不幸離世，等候多時嘅小智愷終於喺6月尾獲取心臟移植機會！

Photo from MamiDaily

由於小智愷嘅體重比同齡嘅小朋友輕，令移植手術多一重困難！經過10小時嘅手術，終於成功將心臟移植，現時暫無排斥現象。小智愷亦恢復意識，依家唔使再依靠呼吸機幫助呼吸啦！

Photo from MamiDaily

雖然成功移植心臟，不過估計最少要留院觀察2至3個月。距離完全康復仲有一段好長嘅路，不過小智愷嘅媽媽指囝囝嘅經歷令佢感覺到香港係充滿愛嘅，佢十分感激捐贈者家屬嘅無私奉獻，又謂囝囝有機會接受心臟移植已經係奇蹟！

Text：Mami Editorial