公主變成新手媽媽嘅生活會係點？ 美插畫家繪出9位迪士尼公主嘅育兒情境

迪士尼公主嘅故事家傳戶曉，大人小朋友都知道最後嘅結局都一定係公主同王子有情人終成眷屬，從此過著幸福快樂嘅生活。不過後續嘅故事又係點呢？當公主同王子變成爸爸媽媽，仲係咪可以咁優雅？

美國畫家 Isaiah Stephens 就為其中9位公主同王子繪畫出婚後成為爸爸媽媽嘅情境，幽默嘅育兒日常令唔少爸爸媽媽都會心微笑呢！

1. 《睡美人》奧蘿拉

公主正努力生產小寶寶，大汗淋漓緊緊捉實王子嘅手，而昔日英勇救出公主嘅王子只能默默忍受手部嘅痛楚靜待公主誕下寶寶。喺努力忍受痛楚嘅太太面前，男人們都顯得微不足道呢！

2.《花木蘭》

平時行軍打仗總係表現嚴肅有霸氣嘅兩位大將軍，喺隔著肚皮撫摸胎兒嘅時候，流露出一副慈父慈母嘅模樣，強烈感受到佢哋嘅喜悅！

3. 《美女與野獸》貝兒

成為媽媽後嘅貝兒都加入親餵母乳嘅行列，無懼喺大庭廣眾下餵哺母乳，隨時滿足肚餓嘅BB。

4.《阿拉丁》茉莉公主

吊兒郎當嘅阿拉丁終於做爸爸啦！睇見阿拉丁一臉興奮嘅樣，相信都好期待兒子出世後同佢一齊坐飛毯周圍去玩！

5.《風中奇緣》寶嘉康蒂

寶嘉康蒂同寶寶一齊瞓覺嘅畫面，予人恬靜美好嘅感覺，畫面中滲出濃濃嘅原始母愛感覺。

6.《公主與青蛙》蒂安娜

蒂安娜見到寶寶向王子「斟茶」，都忍唔住掩臉笑，反之王子一臉不悅。

7.《冰雪奇緣》艾莎

睇黎女皇艾莎嘅小寶寶同媽媽一樣係有製造冰雪嘅能力呢！而小寶寶睇落亦非常帥氣！

8.《魔髮奇緣》樂佩

樂佩同尤金小心翼翼想為寶寶清理小屁屁，但尤金實在太誇張喇！竟然戴著防毒面罩匿喺樂佩身後，喺關鍵時候果然都係媽媽最可靠！

9.《美人魚》愛麗兒

餵寶寶食嘢，好多時寶寶都會玩弄食物，睇愛麗兒一副冇好氣嘅樣，媽媽們係咪好有似曾相識嘅感覺呢？

即使係公主王子，都會面對著同大家相同嘅新手爸媽處境！大家又最鍾意邊張公主嘅插畫呢？

Text：Mami Editorial

Photo Source： Pinterest